ക്രിസ്റ്റ്യാനോ,മെസ്സി എന്നിവരെ പോലെയാണ് സലാ: ഈജിപ്ഷൻ കോച്ച് പറയുന്നു

ഈജിപ്ഷൻ സൂപ്പർ താരമായ മുഹമ്മദ് സലാ പതിവുപോലെ ഈ സീസണിലും മികച്ച പ്രകടനമാണ് നടത്തിക്കൊണ്ടിരിക്കുന്നത്. ലിവർപൂളിന് വേണ്ടി പ്രീമിയർ ലീഗിൽ ആകെ 8 മത്സരങ്ങൾ കളിച്ച താരം 5 ഗോളുകളും 4 അസിസ്റ്റുകളും സ്വന്തമാക്കിയിട്ടുണ്ട്. ഇനി ഈജിപ്തിന് വേണ്ടി ഇന്റർനാഷണൽ മത്സരങ്ങളാണ് സലാ കളിക്കുക.സാമ്പിയ,അൾജീരിയ എന്നിവരാണ് ഈജിപ്തിന്റെ എതിരാളികൾ.

നാഷണൽ ടീമിനോടൊപ്പം ഇതുവരെ കിരീടങ്ങൾ ഒന്നും നേടാൻ സലാക്ക് കഴിഞ്ഞിട്ടില്ല.ഏതായാലും താരത്തെക്കുറിച്ച് ഈജിപ്തിന്റെ പരിശീലകനായ റൂയി വിറ്റോറിയോ ചില കാര്യങ്ങൾ പറഞ്ഞിട്ടുണ്ട്.ക്രിസ്റ്റ്യാനോ റൊണാൾഡോ, ലയണൽ മെസ്സി എന്നിവരെപ്പോലെ ലെഗസിയുള്ള താരമാണ് സലായെന്നും അദ്ദേഹം എക്കാലവും ഓർമ്മിക്കപ്പെടും എന്നുമാണ് ഈ പരിശീലകൻ പറഞ്ഞിട്ടുള്ളത്.അദ്ദേഹത്തിന്റെ വാക്കുകൾ ഇങ്ങനെയാണ്.

” ഞങ്ങളുടെ ദേശീയ ടീമിനെ സംബന്ധിച്ചിടത്തോളം സലാ വളരെ പ്രധാനപ്പെട്ട താരമാണ്. നമ്മൾ ലയണൽ മെസ്സിയെയും ക്രിസ്റ്റ്യാനോ റൊണാൾഡോയെയും എക്കാലവും ഓർമ്മിക്കും. അതുപോലെതന്നെ സലായേയും ഓർമ്മിക്കും.ഇത് കാറ്റഗറിയിൽ തന്നെ വരുന്നവരാണ് നെയ്മർ ജൂനിയറും എംബപ്പേയുമൊക്കെ. ഞങ്ങളുടെ സലാ ടീമിനകത്ത് എപ്പോഴും പോസിറ്റിവിറ്റി നൽകുന്ന താരമാണ്. അദ്ദേഹം ഞങ്ങളോടൊപ്പം ഉള്ളതിൽ ഞങ്ങൾക്ക് ഒരുപാട് അഭിമാനമുണ്ട് ” ഇതാണ് ഈജിപ്തിന്റെ പരിശീലകൻ പറഞ്ഞിട്ടുള്ളത്.

ഈജിപ്തിന്റെ നാഷണൽ ടീമിന് വേണ്ടി 91 മത്സരങ്ങളാണ് ആകെ സലാ കളിച്ചിട്ടുള്ളത്. അതിൽ നിന്ന് 51 ഗോളുകളും 29 അസിസ്റ്റുകളും അദ്ദേഹം നേടിയിട്ടുണ്ട്.ഈജിപ്തിന്റെ ഏറ്റവും പ്രധാനപ്പെട്ട താരം സലായാണ് എന്ന കാര്യത്തിൽ ആർക്കും സംശയങ്ങൾ കാണില്ല.