ക്രിസ്റ്റ്യാനോക്ക് വേണ്ടി കളിക്കില്ല : പോർച്ചുഗീസ് സൂപ്പർ താരം പറയുന്നു.

വരുന്ന ഖത്തർ വേൾഡ് കപ്പിനുള്ള തയ്യാറെടുപ്പുകൾ പോർച്ചുഗലിന്റെ ദേശീയ ടീം ആരംഭിച്ചു കഴിഞ്ഞിട്ടുണ്ട്. പോർച്ചുഗലിൽ തന്നെയാണ് പരിശീലനങ്ങൾ നടക്കുന്നത്. നൈജീരിയക്കെതിരെയുള്ള സൗഹൃദ മത്സരത്തിനു ശേഷമാണ് പോർച്ചുഗൽ ഖത്തറിൽ എത്തുക. സൂപ്പർ താരം ക്രിസ്റ്റ്യാനോ റൊണാൾഡോ അടക്കമുള്ളവർ ഇപ്പോൾ പരിശീലനത്തിൽ പങ്കെടുത്തു കഴിഞ്ഞു.

ഏതായാലും പിഎസ്ജിയുടെ പോർച്ചുഗീസ് സൂപ്പർതാരമായ ഡാനിലോ പെരീര ഇപ്പോൾ ക്രിസ്റ്റ്യാനോ റൊണാൾഡോയെ കുറിച്ച് പല കാര്യങ്ങളും പറഞ്ഞിട്ടുണ്ട്.റൊണാൾഡോയെക്കുറിച്ച് ഇത്രയധികം സംസാരങ്ങൾ നടക്കുന്നത് സ്വാഭാവികമായ ഒരു കാര്യമാണ് എന്നാണ് അദ്ദേഹം പറഞ്ഞിട്ടുള്ളത്.പോർച്ചുഗൽ ക്രിസ്റ്റ്യാനോക്ക് വേണ്ടി മാത്രം കളിക്കില്ലെന്നും മറിച്ച് വിജയങ്ങൾക്ക് വേണ്ടിയാണ് കളിക്കുകയെന്നും ഡാനിലോ കൂട്ടിച്ചേർത്തിട്ടുണ്ട്.അദ്ദേഹത്തിന്റെ വാക്കുകൾ ഇങ്ങനെയാണ്.

‘ ക്രിസ്റ്റ്യാനോയെ കുറിച്ച് എപ്പോഴും വിമർശനങ്ങൾ ഉണ്ടാവുക എന്നുള്ളത് സ്വാഭാവികമാണ്. കാരണം മാധ്യമങ്ങളിൽ ഏറ്റവും കൂടുതൽ വിറ്റഴിക്കപ്പെടുന്ന താരം അദ്ദേഹമാണ്.മാത്രമല്ല എല്ലാ ദിവസവും അദ്ദേഹം സംസാരിക്കുകയും ചെയ്യും.അദ്ദേഹം നല്ലതായാലും മോശമായാലും ആളുകൾ അദ്ദേഹത്തെക്കുറിച്ച് സംസാരിക്കും.ഇതൊക്കെ സ്വാഭാവികമായ ഒരു കാര്യമാണ്.

പോർച്ചുഗലിന്റെ ദേശീയ ടീമിലെ ഏറ്റവും കരുത്തുറ്റ താരമാണ് അദ്ദേഹം. തീർച്ചയായും അദ്ദേഹത്തിലേക്ക് കൂടുതൽ പന്തെത്തിക്കാനും അദ്ദേഹം കൂടുതൽ ഗോളുകൾ നേടാനുമൊക്കെ ഞങ്ങൾ ശ്രമിക്കും. തീർച്ചയായും അതെല്ലാം അദ്ദേഹം ആവശ്യപ്പെടുന്നുമുണ്ട്. ഞങ്ങൾ ക്രിസ്റ്റ്യാനോക്ക് വേണ്ടിയാണ് കളിക്കുന്നത് എന്നുള്ളത് ആളുകൾ പറയുന്നത് സ്വാഭാവികമാണ്.പക്ഷേ അങ്ങനെയല്ല. ഞങ്ങൾ മത്സരങ്ങൾ വിജയിക്കാൻ വേണ്ടി മാത്രമാണ് കളിക്കുന്നത് ” ഇതാണ് ഡാനിലോ പറഞ്ഞിട്ടുള്ളത്.

റൊണാൾഡോയെ സംബന്ധിച്ചിടത്തോളം ഇതൊരു നല്ല സമയമല്ല. അദ്ദേഹത്തെ ചുറ്റിപ്പറ്റി നിരവധി വിവാദങ്ങളുണ്ട്. എന്നാൽ അതിനെയെല്ലാം തരണം ചെയ്തുകൊണ്ട് വേൾഡ് കപ്പിൽ റൊണാൾഡോക്ക് മികച്ച പ്രകടനം പുറത്തെടുക്കാൻ കഴിയുമെന്നാണ് ആരാധകർ പ്രതീക്ഷിക്കുന്നത്.