ക്രിസ്റ്റ്യാനോക്ക് ഇനി ഒന്നും തന്നെ തെളിയിക്കാനില്ല:ഫ്രഞ്ച് ഗോൾകീപ്പർ

ഇന്ന് യൂറോ കപ്പിൽ നടക്കുന്ന മത്സരത്തിൽ കരുത്തരായ ഫ്രാൻസും പോർച്ചുഗല്ലും തമ്മിലാണ് ഏറ്റുമുട്ടുക. ഇന്ന് രാത്രി ഇന്ത്യൻ സമയം 12:30നാണ് ഈയൊരു മത്സരം അരങ്ങേറുക. സൂപ്പർ താരങ്ങളായ ക്രിസ്റ്റ്യാനോ റൊണാൾഡോയും കിലിയൻ എംബപ്പേയും നേർക്കുനേർ വരുന്നു എന്ന പ്രത്യേകത ഈ മത്സരത്തിനുണ്ട്. ഒരു കിടിലൻ പോരാട്ടമാണ് ഫുട്ബോൾ ആരാധകർ പ്രതീക്ഷിക്കുന്നത്.

ക്രിസ്റ്റ്യാനോയെ സംബന്ധിച്ചിടത്തോളം ഈ യൂറോ കപ്പ് ബുദ്ധിമുട്ടേറിയ രീതിയിലാണ് കടന്നുപോയിക്കൊണ്ടിരിക്കുന്നത്.നാല് മത്സരങ്ങൾ കളിച്ചിട്ടും ഒരു ഗോൾ പോലും നേടാൻ അദ്ദേഹത്തിന് കഴിഞ്ഞിട്ടില്ല.മാത്രമല്ല കഴിഞ്ഞ മത്സരത്തിൽ അദ്ദേഹം പെനാൽറ്റി പാഴാക്കുകയും ചെയ്തിരുന്നു. എന്നാൽ ഫ്രാൻസിന്റെ രണ്ടാം ഗോൾ കീപ്പറായ ബ്രൈസ് സാംബ ക്രിസ്റ്റ്യാനോക്ക് പിന്തുണയുമായി രംഗത്ത് വന്നിട്ടുണ്ട്. റൊണാൾഡോക്ക് ഫുട്ബോളിൽ ഇനി ഒന്നും തന്നെ തെളിയിക്കാനില്ല എന്നാണ് സാംബ പറഞ്ഞിട്ടുള്ളത്.അദ്ദേഹത്തിന്റെ വാക്കുകൾ ഇപ്രകാരമാണ്.

“ഗോളുകൾ നേടുക എന്നുള്ളത് മാത്രമാണ് ഇപ്പോൾ അദ്ദേഹത്തിന്റെ ആഗ്രഹം.ഫുട്ബോളിൽ റൊണാൾഡോക്ക് ഇനി ഒന്നും തന്നെ തെളിയിക്കാൻ ബാക്കിയില്ല. തീർച്ചയായും അദ്ദേഹത്തെ തടയാൻ ഞങ്ങൾ എപ്പോഴും ശ്രദ്ധ പുലർത്തേണ്ടതുണ്ട്. ക്രിസ്റ്റ്യാനോക്കെതിരെ കളിക്കാൻ സാധിക്കുന്നു എന്നുള്ളത് തന്നെ സന്തോഷം നൽകുന്ന ഒരു കാര്യമാണ് “ഇതാണ് ഫ്രഞ്ച് ഗോൾകീപ്പർ പറഞ്ഞിട്ടുള്ളത്.

ഒരു അസിസ്റ്റ് മാത്രമാണ് റൊണാൾഡോ ഈ യൂറോ കപ്പിൽ സ്വന്തമാക്കിയിട്ടുള്ളത്. എന്നിരുന്നാലും ഇന്നത്തെ മത്സരത്തിന്റെ സ്റ്റാർട്ടിങ് ഇലവനിൽ അദ്ദേഹം ഉണ്ടാകും എന്ന് തന്നെയാണ് റിപ്പോർട്ടുകൾ. അതേസമയം എംബപ്പേ ഒരു പെനാൽറ്റി ഗോൾ മാത്രമാണ് ഈ യൂറോ കപ്പിൽ നേടിയിട്ടുള്ളത്. പോർച്ചുഗൽ പ്രതിരോധ നിരക്ക് എംബപ്പേയുടെ സാന്നിധ്യം വലിയ തലവേദനയാകാൻ സാധ്യതയുണ്ട്.