ക്യാപ്റ്റനായത് തകർപ്പൻ പ്രകടനത്തോടെ ആഘോഷിച്ച് എംബപ്പേ,നെതർലാന്റ്സിനെ പഞ്ഞിക്കിട്ട് ഫ്രാൻസ്.

ഇന്നലെ നടന്ന യൂറോ യോഗ്യത മത്സരത്തിൽ വമ്പൻമാരായ ഫ്രാൻസിന് തകർപ്പൻ വിജയം. എതിരില്ലാത്ത നാല് ഗോളുകൾക്കാണ് നെതർലാന്റ്സിനെ ഫ്രാൻസ് പരാജയപ്പെടുത്തിയത്. നായകനായ കിലിയൻ എംബപ്പേയാണ് ഈ മത്സരത്തിൽ തിളങ്ങിയത്.

ഫ്രാൻസിന്റെ ക്യാപ്റ്റൻ ആയതിനുശേഷം ഉള്ള എംബപ്പേയുടെ ആദ്യത്തെ മത്സരമായിരുന്നു ഇത്. ഇരട്ട ഗോളുകളും ഒരു അസിസ്റ്റുമായാണ് എംബപ്പേ ഈ മത്സരം ആഘോഷിച്ചത്.ഗ്രീസ്മാൻ,ഉപമെക്കാനോ എന്നിവർ ശേഷിച്ച ഗോളുകൾ നേടി. മത്സരത്തിന്റെ രണ്ടാം മിനിറ്റിൽ തന്നെ എംബപ്പേയുടെ അസിസ്റ്റിൽ നിന്നും ഗ്രീസ്മാൻ ആണ് ഗോൾ കണ്ടെത്തിയത്. അധികം വൈകാതെ തന്നെ ഉപമെക്കാനോയുടെ ഗോളും വന്നു.

21ആം മിനുട്ടിൽ എംബപ്പേ ഗോൾ നേടി.ഷുവാമെനിയായിരുന്നു ഇതിന് അസിസ്റ്റ് നൽകിയത്.ആദ്യപകുതിയിൽ തന്നെ മൂന്ന് ഗോളുകൾ നേടി കൊണ്ട് ഫ്രാൻസ് വിജയം ഉറപ്പിച്ചിരുന്നു.88ആം മിനുട്ടിൽ എംബപ്പേ ഒരിക്കൽക്കൂടി ഗോൾവല ചലിപ്പിക്കുകയായിരുന്നു.

അതേസമയം ഇന്നലെ നടന്ന മറ്റൊരു മത്സരത്തിൽ ബെൽജിയം വിജയിച്ചിട്ടുണ്ട്. സൂപ്പർ താരം ലുക്കാകുവിന്റെ മികവിലാണ് ബെൽജിയം ഈ വിജയം സ്വന്തമാക്കിയത്. എതിരില്ലാത്ത മൂന്ന് ഗോളുകൾക്ക് സ്വീഡനെ ബെൽജിയം പരാജയപ്പെടുത്തുകയായിരുന്നു. മൂന്ന് ഗോളുകളും നേടിയത് ലുക്കാകുവായിരുന്നു.