കോപ്പ ഫൈനലിലെ ഗോളിനെക്കാളും പ്രധാനപ്പെട്ട ഗോൾ വരാനുണ്ട് : ഡി മരിയ!

കഴിഞ്ഞ കോപ്പ അമേരിക്ക ഫൈനലിൽ കരുത്തരായ ബ്രസീലിനെ എതിരില്ലാത്ത ഒരു ഗോളിന് പരാജയപ്പെടുത്തി കൊണ്ടായിരുന്നു അർജന്റീന കിരീടം ചൂടിയത്. അതോടെ 28 വർഷത്തെ കിരീടവരൾച്ചക്കായിരുന്നു വിരാമമായത്. അർജന്റീനയുടെ വിജയഗോൾ നേടി ഹീറോയായത് സൂപ്പർ താരം എയ്ഞ്ചൽ ഡി മരിയയായിരുന്നു.ഇപ്പോഴിതാ ആ ഗോളിനെ കുറിച്ച് ഡി മരിയ മനസ്സ് തുറന്ന് സംസാരിച്ചിട്ടുണ്ട്.കരിയറിലെ ഏറ്റവും പ്രധാനപ്പെട്ട ഗോൾ കോപ്പ ഫൈനലിലെ ഗോൾ അല്ലെന്നും ചെറിയ കാലയളവിനുള്ളിൽ തന്നെ അതിലും പ്രധാനപ്പെട്ട ഒരു ഗോൾ പിറക്കുമെന്നാണ് പ്രതീക്ഷിക്കുന്നത് എന്നുമാണ് ഡി മരിയ അറിയിച്ചിട്ടുള്ളത്.കഴിഞ്ഞ ദിവസം ടിവൈസി സ്പോർട്സിന് നൽകിയ ഇന്റർവ്യൂവിൽ സംസാരിക്കുകയായിരുന്നു ഡി മരിയ.

” കോപ്പ അമേരിക്ക കിരീടം എന്നുള്ളത് എല്ലാമാണ്.എന്റെ കുട്ടിക്കാലം മുതലേ ഞാൻ ആഗ്രഹിച്ച കാര്യമാണ് ഇപ്പോൾ സംഭവിച്ചിരിക്കുന്നത്.കോപ്പ അമേരിക്കയെ കുറിച്ച് ചിന്തിക്കുമ്പോൾ ഒരായിരം കാര്യങ്ങളാണ് എന്റെ തലയിലൂടെ കടന്നു പോവുക.ആദ്യം ഒരുപാട് മോശം ഓർമ്മകളാണ് കടന്നു വരിക.പക്ഷേ ഇപ്പോൾ മനോഹരമായ ഓർമ്മകൾ മാത്രമേയൊള്ളൂ.28 വർഷത്തിന് ശേഷം കിരീടം നേടുന്നു,എന്റെ കുടുംബവും ആളുകളുമെല്ലാം വളരെയധികം സന്തോഷിക്കുന്നു.ഇതെല്ലാം ജീവിതകാലം മുഴുവനും ഓർത്തിരിക്കാനുള്ള മനോഹരമായ ഓർമ്മകളാണ്.കോപ്പ അമേരിക്ക ഫൈനലിലെ ഗോൾ എന്റെ കരിയറിലെ ഏറ്റവും പ്രധാനപ്പെട്ട ഗോൾ അല്ല. എന്തെന്നാൽ ചെറിയ കാലയളവിനുള്ളിൽ തന്നെ അതിലും പ്രധാനപ്പെട്ട ഒരു പിറക്കുമെന്നാണ് ഞാൻ പ്രതീക്ഷിക്കുന്നത് ” ഇതാണ് ഡി മരിയ പറഞ്ഞിട്ടുള്ളത്.

2019 കോപ്പ അമേരിക്ക സെമിയിൽ ബ്രസീലിനോട് പരാജയപ്പെട്ടതിന് ശേഷം ഇതുവരെ ഒരൊറ്റ പരാജയവും അർജന്റീന ഏറ്റുവാങ്ങിയിട്ടില്ല. ഈ കുതിപ്പിൽ തന്റേതായ പങ്കു വഹിച്ചിട്ടുള്ള താരമാണ് ഡി മരിയ.