കളി തോറ്റു,കട്ടക്കലിപ്പിൽ ക്രിസ്റ്റ്യാനോ, പെനാൽറ്റി നൽകാത്തതിൽ റഫറിക്ക് നേരെയും ആക്രോശം

ഇന്നലെ നടന്ന അന്താരാഷ്ട്ര സൗഹൃദ മത്സരത്തിൽ യൂറോപ്പ്യൻ വമ്പൻമാരായ പോർച്ചുഗലിന് തോൽവി ഏറ്റുവാങ്ങേണ്ടി വന്നിരുന്നു. എതിരില്ലാത്ത രണ്ട് ഗോളുകൾക്കാണ് സ്ലോവേനിയ പോർച്ചുഗലിനെ പരാജയപ്പെടുത്തിയത്. മത്സരത്തിൽ സൂപ്പർ താരം ക്രിസ്റ്റ്യാനോ റൊണാൾഡോ കളിച്ചിരുന്നുവെങ്കിലും അദ്ദേഹത്തിന് പ്രത്യേകിച്ചൊന്നും ചെയ്യാൻ കഴിഞ്ഞില്ല. അതേസമയം ബ്രൂണോ,സിൽവ,ലിയാവോ തുടങ്ങിയ സുപ്രധാന താരങ്ങൾ ഇല്ലാതെയാണ് പോർച്ചുഗൽ കളിച്ചിരുന്നത്.

റോബർട്ടോ മാർട്ടിനെസ്സ് പരിശീലകനായി എത്തിയതിനുശേഷമുള്ള ആദ്യത്തെ തോൽവിയാണ് ഇപ്പോൾ പോർച്ചുഗലിനെ വഴങ്ങേണ്ടി വന്നിട്ടുള്ളത്. ഈ തോൽവിയിൽ ക്രിസ്റ്റ്യാനോ റൊണാൾഡോ കടുത്ത നിരാശനായിരുന്നു. മത്സരം അവസാനിച്ച ഉടനെ തന്നെ അദ്ദേഹം ദേഷ്യത്തോട് കൂടി വേഗത്തിൽ ഡ്രസ്സിംഗ് റൂമിലേക്ക് പോവുകയും ചെയ്തു. ഇതിനിടയിൽ അദ്ദേഹം ഫോർത്ത് റഫറിയോട് ആക്രോശിക്കുകയും ചെയ്തിട്ടുണ്ട്.

അതായത് പോർച്ചുഗലിന് ലഭിക്കേണ്ട രണ്ട് പെനാൽറ്റികൾ നൽകിയില്ല എന്നാണ് ക്രിസ്റ്റ്യാനോ റൊണാൾഡോ അവകാശപ്പെടുന്നത്. റഫറിക്ക് നേരെ 2 എന്ന് ആംഗ്യത്തിലൂടെ കാണിച്ചുകൊണ്ട് റൊണാൾഡോ ഇക്കാര്യം വ്യക്തമാക്കുകയും ചെയ്തിട്ടുണ്ട്. പിന്നീട് അദ്ദേഹം വേഗത്തിൽ ഡ്രസിങ് റൂമിലേക്ക് മടങ്ങുകയായിരുന്നു. ഇതിന്റെ വീഡിയോ ട്വിറ്റർ ഉൾപ്പെടെയുള്ള സോഷ്യൽ മീഡിയയിൽ ലഭ്യമാണ്.

കഴിഞ്ഞ മത്സരത്തിൽ ക്രിസ്റ്റ്യാനോ റൊണാൾഡോ പോർച്ചുഗലിനു വേണ്ടി കളിച്ചിരുന്നില്ല.ഈ മത്സരത്തിലായിരുന്നു അദ്ദേഹം തിരിച്ചുവന്നിരുന്നത്. സമീപകാലത്ത് തകർപ്പൻ പ്രകടനം നടത്തിയ പോർച്ചുഗലിനെ സംബന്ധിച്ചിടത്തോളം ഈ തോൽവി ഒരല്പം ക്ഷീണം ചെയ്യുന്ന ഒന്നാണ്.പക്ഷേ പരിശീലകൻ റോബർട്ടോ മാർട്ടിനസിന് അക്കാര്യത്തിൽ പരാതികൾ ഒന്നുമില്ല. ഇനി ജൂൺ മാസം നടക്കുന്ന സൗഹൃദ മത്സരങ്ങളിൽ ഫിൻലാൻഡ്, ക്രൊയേഷ്യ,അയർലാൻഡ് എന്നിവരാണ് പോർച്ചുഗലിന്റെ എതിരാളികൾ.