കലാശപ്പോരാട്ടത്തിന് സജ്ജരായി അർജന്റീന,സ്റ്റാർട്ടിങ് ഇലവനിൽ ഉണ്ടാവുക ഈ താരങ്ങൾ!

ഖത്തർ വേൾഡ് കപ്പിന് ഇന്ന് തിരശ്ശീല വീഴുകയാണ്. ഇന്ന് നടക്കുന്ന ഫൈനൽ മത്സരത്തിൽ അർജന്റീനയും ഫ്രാൻസും തമ്മിലാണ് ഏറ്റുമുട്ടുക. ഇന്ന് രാത്രി ഇന്ത്യൻ സമയം 8:30ന് ലുസൈൽ സ്റ്റേഡിയത്തിൽ വെച്ചാണ് ഈ കലാശ പോരാട്ടം അരങ്ങേറുക. കിരീടത്തിന് വേണ്ടിയുള്ള പോരാട്ടമായതിനാൽ ഒരു തകർപ്പൻ മത്സരം കാണാൻ കഴിയും എന്നുള്ള പ്രതീക്ഷയിലാണ് ആരാധകരുള്ളത്.

ആരൊക്കെയായിരിക്കും അർജന്റീനക്ക് വേണ്ടി ഇന്ന് കളത്തിലേക്ക് ഇറങ്ങുക? അർജന്റീന മാധ്യമങ്ങൾ ഇതുമായി ബന്ധപ്പെട്ട സാധ്യത ഇലവനുകൾ പുറത്തു വിട്ടിട്ടുണ്ട്.5-3-2 എന്ന ഫോർമേഷനിൽ ഇറങ്ങാൻ സ്കലോണി തീരുമാനിച്ചു കഴിഞ്ഞിട്ടുണ്ട് എന്നുള്ള റിപ്പോർട്ടുകളാണ് ഏറ്റവും ഒടുവിൽ ലഭിക്കുന്നത്. അതേസമയം 4-4-2 ഫോർമേഷനെ തള്ളിക്കളയാനുമായിട്ടില്ല.

പ്രതിരോധ നിരയിൽ മൂന്ന് സെന്റർ ബാക്കുമാരെ അണിനിരത്താനാണ് സ്കലോണി തീരുമാനിച്ചിട്ടുള്ളത്.റൊമേറോ,ഓട്ടമെന്റി,ലിസാൻഡ്രോ എന്നിവരായിരിക്കും ഉണ്ടാവുക.അക്കൂഞ്ഞ,മൊളീന എന്നിവർ ഇരുവശങ്ങളിലും ഉണ്ടാവും. മിഡ്‌ഫീൽഡിൽ ഡി പോൾ,എൻസോ,മാക്ക് ആല്ലിസ്റ്റർ എന്നിവർ തന്നെയായിരിക്കും. മുന്നേറ്റ നിരയിൽ ലയണൽ മെസ്സിയും ഹൂലിയൻ ആൽവരസും ഉണ്ടാവും.

ഇനി 4-4-2 ഫോർമേഷൻ ആണെങ്കിൽ ഡി മരിയ സ്റ്റാർട്ടിങ് ഇലവനിൽ ഉണ്ടാവും. മറിച്ച് ലിസാൻഡ്രോ ഉണ്ടാവില്ല. അതേസമയം ഡി മരിയ വന്നാലും അദ്ദേഹം ഒരു മിഡ്ഫീൽഡർ എന്ന രൂപേണയായിരിക്കും കളിക്കുക. ഏതായാലും അർജന്റീനയുടെ രണ്ട് സാധ്യത ഇലവനുകൾ താഴെ നൽകുന്നു.