ഒരു ഖേദവുമില്ല: അർജന്റീനയെ കുറിച്ച് ഗോൺസാലോ ഹിഗ്വയ്ൻ പറയുന്നു!

ദീർഘകാലം അർജന്റീനയുടെ ദേശീയ ടീമിന് വേണ്ടി കളിച്ചിട്ടുള്ള സൂപ്പർതാരമാണ് ഗോൺസാലോ ഹിഗ്വയ്ൻ. അർജന്റീനക്ക് വേണ്ടി ആകെ കളിച്ച 75 മത്സരങ്ങളിൽ നിന്ന് 31 ഗോളുകൾ നേടാനും ഈ സൂപ്പർതാരത്തിന് സാധിച്ചിട്ടുണ്ട്. എന്നാൽ അർജന്റൈൻ കരിയർ അദ്ദേഹത്തിന് ഒരിക്കലും എളുപ്പമുള്ളതായിരുന്നില്ല. പലപ്പോഴും വലിയ വിമർശനങ്ങൾ താരത്തിന് ഏറ്റുവാങ്ങേണ്ടി വന്നിരുന്നു. പല തോൽവികളിലും ബലിയാട് ആക്കപ്പെട്ടത് ഹിഗ്വയ്നായിരുന്നു.

ഏതായാലും അർജന്റൈൻ ദേശീയ ടീമിന്റെ കരിയറിൽ തനിക്ക് ലഭിച്ച വിമർശനങ്ങളോട് ഇപ്പോൾ ഹിഗ്വയ്ൻ പ്രതികരിച്ചിട്ടുണ്ട്.അർജന്റൈൻ കരിയറിൽ തനിക്ക് യാതൊരു ഖേദവും ഇല്ലെന്നും തന്റെ ജീവിതവും അതിനേക്കാൾ കൂടുതലും അർജന്റീനക്ക് വേണ്ടി നൽകിയ വ്യക്തിയാണ് താനെന്നുമാണ് ഹിഗ്വയ്ൻ പറഞ്ഞിട്ടുള്ളത്. അദ്ദേഹത്തിന്റെ വാക്കുകളെ Tyc റിപ്പോർട്ട് ചെയ്തിരിക്കുന്നത് ഇങ്ങനെയാണ്.

” എന്നെ പ്രശംസിച്ചത് കൊണ്ട് ഞാൻ മികച്ചവനാവുകയോ അല്ലെങ്കിൽ വിമർശിച്ചത് കൊണ്ട് ഞാൻ മോശമാവുകയോ ചെയ്യുന്നില്ല. ആ പോയിന്റിൽ നിന്നൊക്കെ ഞാൻ വിട്ടിട്ടുണ്ട്. ഏറ്റവും പ്രധാനപ്പെട്ട കാര്യം ബാലൻസ് കൈവരിക്കുക എന്നുള്ളതാണ്.ഞാൻ വളരെയധികം ശാന്തനാണ്.അതിനുള്ള കാരണം അർജന്റീനയുടെ ദേശീയ ടീമിന് വേണ്ടി ഞാൻ എന്റെ ജീവിതവും അതിനേക്കാൾ കൂടുതലും നൽകിയിട്ടുണ്ട്. എന്റെ സഹതാരങ്ങളെ പോലെ ജീവിതം അർജന്റീനക്ക് വേണ്ടി തന്നെ സമർപ്പിച്ച ഒരാളാണ് ഞാൻ. നാഷണൽ ടീമിന് വേണ്ടി ഞാൻ എന്തൊക്കെ സംഭാവന ചെയ്തു അതിലൊക്കെ ഞാൻ അഭിമാനം കൊള്ളുന്നുണ്ട്. മാത്രമല്ല യാതൊരു ഖേദവും എനിക്കില്ല ” ഇതാണ് ഹിഗ്വയ്ൻ പറഞ്ഞിട്ടുള്ളത്.

നിലവിൽ അമേരിക്കൻ ക്ലബ്ബായ ഇന്റർ മിയാമിക്ക് വേണ്ടിയാണ് താരം കളിച്ചു കൊണ്ടിരിക്കുന്നത്. ഈ സീസണിൽ മികച്ച പ്രകടനം നടത്താൻ ഹിഗ്വയ്ന് സാധിക്കുന്നുണ്ട്. 25 മത്സരങ്ങൾ കളിച്ച താരം 13 ഗോളുകൾ നേടിയിട്ടുണ്ട്.