ഇരട്ടഗോളുകളുമായി ക്രിസ്റ്റ്യാനോയും ബെൻസിമയും, പ്രീ ക്വാർട്ടറിലെത്തി പോർച്ചുഗൽ!

ഇന്നലെ യൂറോ കപ്പിൽ നടന്ന അതിനിർണായക മത്സരത്തിൽ നിലവിലെ ചാമ്പ്യൻമാരായ പോർച്ചുഗല്ലിന് സമനില.2-2 എന്ന സ്കോറിനാണ് ഫ്രാൻസുമായി പറങ്കിപ്പട സമനിലയിൽ പിരിഞ്ഞത്. ഇതോടെ നാലു പോയിന്റുകൾ നേടിയ പോർച്ചുഗൽ പ്രീ ക്വാർട്ടറിൽ പ്രവേശിച്ചു. ഇരട്ടഗോളുകൾ നേടിക്കൊണ്ട് ക്രിസ്റ്റ്യാനോ റൊണാൾഡോ പോർച്ചുഗല്ലിനായി തിളങ്ങിയപ്പോൾ മറുഭാഗത്ത് ഫ്രാൻസിന്റെ രണ്ട് ഗോളുകളും നേടിയത് കരിം ബെൻസിമയായിരുന്നു.ഇനി പ്രീ ക്വാർട്ടറിൽ ബെൽജിയത്തിനെയാണ് പോർച്ചുഗൽ നേരിടുക. ഫ്രാൻസിന്റെ എതിരാളികൾ സ്വിറ്റ്സർലാന്റ് ആണ്.

മത്സരത്തിന്റെ 31-ആം മിനുട്ടിൽ ക്രിസ്റ്റ്യാനോയിലൂടെയാണ് പോർച്ചുഗൽ ലീഡ് നേടിയത്. ടീമിന് ലഭിച്ച പെനാൽറ്റി റൊണാൾഡോ ലക്ഷ്യം കാണുകയായിരുന്നു.എന്നാൽ ആദ്യപകുതിയുടെ അവസാനത്തിൽ പെനാൽറ്റിയിലൂടെ തന്നെ കരിം ബെൻസിമ ഇതിന് മറുപടി നൽകി.രണ്ടാം പകുതിയുടെ 47-ആം മിനിറ്റിൽ ബെൻസിമ വീണ്ടും നിറയൊഴിച്ചു. പോഗ്ബയുടെ അസിസ്റ്റിൽ നിന്നാണ് ബെൻസിമ ഇരട്ടഗോൾ തികച്ചത്.എന്നാൽ അറുപതാം മിനുട്ടിൽ ലഭിച്ച പെനാൽറ്റി വീണ്ടും ലക്ഷ്യത്തിൽ എത്തിച്ചു കൊണ്ട് ക്രിസ്റ്റ്യാനോ പോർച്ചുഗല്ലിന് സമനില നേടികൊടുക്കുകയായിരുന്നു.