ഇത് ഞാൻ നേരത്തെ പ്രവചിച്ചു:വെളിപ്പെടുത്തലുമായി അക്യൂഞ്ഞ
കോപ്പ അമേരിക്ക കിരീടം നിലനിർത്താൻ വമ്പൻമാരായ അർജന്റീനക്ക് സാധിച്ചിരുന്നു. കലാശ പോരാട്ടത്തിൽ എതിരില്ലാത്ത ഒരു ഗോളിനാണ് അർജന്റീന കൊളംബിയയെ പരാജയപ്പെടുത്തിയത്. മത്സരത്തിന്റെ എക്സ്ട്രാ ടൈമിൽ ലൗറ്ററോ മാർട്ടിനസ് നേടിയ ഗോളാണ് അവർക്ക് വിജയം സമ്മാനിച്ചത്.ലോ ചെൽസോയുടെ പാസിൽ നിന്നാണ് ഈ ഗോൾ പിറന്നിട്ടുള്ളത്.
പകരക്കാരനായി വന്ന ലൗറ്ററോ അർജന്റീനയുടെ രക്ഷകനാകുന്ന കാഴ്ച്ചയാണ് മയാമിയിലെ ഹാർഡ് റോക്ക് സ്റ്റേഡിയത്തിൽ കാണാൻ കഴിഞ്ഞത്. എന്നാൽ അർജന്റൈൻ സൂപ്പർ താരമായ മാർക്കോസ് അക്യൂഞ്ഞ ഇക്കാര്യം നേരത്തെ പ്രവചിച്ചിരുന്നു.AFA ക്ക് നൽകിയ സന്ദേശത്തിലാണ് അക്യൂഞ്ഞ ഇക്കാര്യം പറഞ്ഞിട്ടുള്ളത്.അദ്ദേഹത്തിന്റെ വാക്കുകൾ ഇങ്ങനെയാണ്.
” ഫൈനലിൽ ലൗറ്ററോ മാർട്ടിനസ് ഗോളടിക്കുമെന്നും അങ്ങനെ നമ്മൾ കിരീടം ചൂടുമെന്നും ഞാൻ പ്രെഡിക്റ്റ് ചെയ്തിരുന്നു. ഇത് ഞാൻ ലൗറ്ററോയോട് പറയുകയും ചെയ്തു. അത് തന്നെയാണ് ഇപ്പോൾ സംഭവിച്ചിട്ടുള്ളത് ” ഇതാണ് അക്യൂഞ്ഞ പറഞ്ഞിട്ടുള്ളത്. കൂടാതെ ആരാധകർക്കായി ഇൻസ്റ്റഗ്രാമിൽ അദ്ദേഹം ഒരു പോസ്റ്റ് പങ്കുവെക്കുകയും ചെയ്തിട്ടുണ്ട്. അതിലെ താരത്തിന്റെ വാക്കുകൾ ഇങ്ങനെയാണ്.
” ആരാധകരുടെ ഉപാധികളില്ലാത്ത പിന്തുണക്ക് ഞങ്ങൾ നന്ദി പറയുന്നു. സത്യം പറഞ്ഞാൽ ഈ ആരാധകർ ഇല്ലായിരുന്നുവെങ്കിൽ ഒരുപക്ഷേ ഞങ്ങൾക്ക് ഇതൊന്നും നേടാൻ സാധിക്കുമായിരുന്നില്ല ” ഇതാണ് താരം ഇൻസ്റ്റഗ്രാമിൽ കുറിച്ചിട്ടുള്ളത്.
ഏതായാലും ഈ കോപ്പ അമേരിക്കയിൽ മിന്നുന്ന പ്രകടനം അർജന്റീനക്ക് വേണ്ടി നടത്തിയത് ലൗറ്ററോ മാർട്ടിനസ് തന്നെയാണ്. 5 ഗോളുകളാണ് അദ്ദേഹം നേടിയിട്ടുള്ളത്. ഗോൾഡൻ ബൂട്ട് സ്വന്തമാക്കാൻ അദ്ദേഹത്തിന് സാധിക്കുകയും ചെയ്തു.
