ആരാധനാപാത്രത്തെ കണ്ട ആവേശത്തിൽ എംബാപ്പെ, പുഞ്ചിരി തൂകി ക്രിസ്റ്റ്യാനോ, വീഡിയോ കാണാം !

ഇന്നലെ നടന്ന ഫ്രാൻസ് vs പോർച്ചുഗൽ മത്സരം മറ്റൊരു അസുലഭമുഹൂർത്തത്തിനാണ് സാക്ഷ്യം വഹിച്ചത്. തന്റെ ആരാധനാപാത്രത്തെ നേരിട്ട് കണ്ടതിന്റെയും എതിരെ കളിക്കുന്നതിന്റെയും ആവേശത്തിലായിരുന്നു എംബാപ്പെ. എന്നാൽ ക്രിസ്റ്റ്യാനോ റൊണാൾഡോയും താരത്തെ കണ്ടില്ലെന്ന് നടിച്ചില്ല. എംബാപ്പെയെ റൊണാൾഡോ ആശ്ലേഷിക്കുകയും കുറച്ചു നേരം ഇരുവരും സൗഹൃദസംഭാഷണത്തിൽ ഏർപ്പെടുകയും ചെയ്തു. കളത്തിനകത്ത്‌ വെച്ചായിരുന്നു ഇത്. മത്സരത്തിന്റെ രണ്ടാം പകുതി തുടങ്ങുന്നതിന്റെ തൊട്ട് മുമ്പായിരുന്നു ഇത്. ഒടുവിൽ പുഞ്ചിരി തൂകി കൊണ്ടാണ് റൊണാൾഡോയും എംബാപ്പെയും സംഭാഷണം അവസാനിപ്പിച്ചത്. തന്റെ ആരാധനാപാത്രമാണ് റൊണാൾഡോ എന്ന് എംബാപ്പെ ഒട്ടേറെ തവണ തുറന്നു പറഞ്ഞിട്ടുള്ള കാര്യമാണ്. മാത്രമല്ല ഇന്നലെ റൊണാൾഡോയോടൊപ്പം നിൽക്കുന്ന ചിത്രം ‘Idol’ എന്ന തലകെട്ടോട് കൂടി സമൂഹമാധ്യമങ്ങളിൽ പങ്കുവെക്കാനും എംബാപ്പെ മറന്നില്ല.

മുമ്പ് തന്റെ റൂമിന്റെ ചുമർ റൊണാൾഡോയുടെ ചിത്രങ്ങളാൽ അലങ്കരിച്ചത് എംബാപ്പെ തന്നെ പുറത്തു വിട്ടിരുന്നു. റൊണാൾഡോയെ കണ്ടാണ് താൻ വളർന്നത് എന്നാണ് എംബാപ്പെ മുമ്പ് പറഞ്ഞത്. 2017-ൽ പിഎസ്ജി റയലിനെ നേരിടാൻ പോവുന്നതിന്റെ മുമ്പ് എംബാപ്പെ പറഞ്ഞത് ഇങ്ങനെയാണ്. ” കുട്ടിക്കാലം മുതലേ എന്റെ ഹീറോയാണ് റൊണാൾഡോ. അദ്ദേഹത്തെ വാൽഡേബെബാസിൽ വെച്ച് കാണാൻ കഴിഞ്ഞത് വളരെയധികം സന്തോഷമുണ്ടാക്കുന്ന കാര്യമാണ്. എന്റെ ചെറുപ്പകാലത്ത് തന്നെ ഞാൻ ആരാധിച്ചു പോന്ന താരമാണ് റൊണാൾഡോ. അഞ്ച് ബാലൺ ഡിയോർ നേടിയ താരത്തിൽ നിന്നും നിങ്ങൾക്ക്‌ ഒരുപാട് പഠിക്കാനുണ്ടാകും. അദ്ദേഹം മഹത്തായ ഒരു താരമാണ് ” എംബാപ്പെ പറഞ്ഞു. പിഎസ്ജിയിൽ എത്തുന്നതിന്റെ മുമ്പ് തന്നെ റൊണാൾഡോയെ കാണാൻ എംബാപ്പെക്ക്‌ ഭാഗ്യം ലഭിച്ചിരുന്നു. എന്നാൽ ഇന്നലെ വീണ്ടും ഇരുവരും എതിരാളികളായി കളത്തിൽ ഇറങ്ങുകയായിരുന്നു. മത്സരത്തിൽ ഇരുടീമുകളും സമനിലയിൽ പിരിഞ്ഞു.