ആരാധകർക്ക് സന്തോഷം നൽകുന്ന സന്ദേശവുമായി നെയ്മർ ജൂനിയർ!

ഖത്തർ വേൾഡ് കപ്പിലെ ആദ്യ മത്സരത്തിൽ ബ്രസീൽ സെർബിയയെ രണ്ടു ഗോളുകൾക്ക് പരാജയപ്പെടുത്തിയിരുന്നുവെങ്കിലും ആരാധകർക്ക് ഏറ്റവും കൂടുതൽ നിരാശ നൽകിയ ഒരു കാര്യം അവിടെ സംഭവിച്ചിരുന്നു. സൂപ്പർ താരം നെയ്മർ ജൂനിയർക്ക് മത്സരത്തിൽ പരിക്കേൽക്കുകയായിരുന്നു.ആങ്കിൾ ഇഞ്ചുറിയായിരുന്നു നെയ്മർക്ക് ഏറ്റിരുന്നത്. അതിന്റെ ഫലമായി കൊണ്ട് നെയ്മർക്ക് ഗ്രൂപ്പ് ഘട്ടത്തിലെ ബാക്കി രണ്ടു മത്സരങ്ങൾ നഷ്ടമാവുകയും ചെയ്തിരുന്നു.

പ്രീ ക്വാർട്ടറിൽ സൗത്ത് കൊറിയയാണ് ബ്രസീലിന്റെ എതിരാളികൾ.ആ മത്സരത്തിൽ നെയ്മർ കളിക്കുമോ എന്നുള്ളതാണ് ബ്രസീലിയൻ ആരാധകർക്ക് ഏറ്റവും കൂടുതൽ ഇപ്പോൾ അറിയേണ്ട കാര്യം. നെയ്മർ അദ്ദേഹത്തിന്റെ പരിക്കിൽ നിന്നും മുക്തനായി വരുന്നുണ്ട്.മാത്രമല്ല കഴിഞ്ഞദിവസം താരം ബോളുമായുള്ള പരിശീലനം നടത്തുകയും ചെയ്തിരുന്നു.

ഇതിന് പിന്നാലെ നെയ്മർ ജൂനിയർ ആരാധകർക്ക് സന്തോഷം നൽകുന്ന ഒരു സന്ദേശം പങ്കുവെച്ചിട്ടുണ്ട്. താൻ പരിശീലനം നടത്തുന്ന ചിത്രങ്ങളാണ് നെയ്മർ ഇൻസ്റ്റഗ്രാമിൽ പോസ്റ്റ് ചെയ്തിട്ടുള്ളത്.അതിന്റെ ക്യാപ്ഷൻ ആയി കൊണ്ട് നെയ്മർ കുറിച്ചിരിക്കുന്നത്.” ഞാനിപ്പോൾ നല്ല രൂപത്തിലാണ് ഉള്ളത്. ഇങ്ങനെ ആവുമെന്നുള്ളത് എനിക്ക് നേരത്തെ അറിയാമായിരുന്നു ” ഇതാണ് നെയ്മർ കുറിച്ചിരിക്കുന്നത്.

അതായത് നെയ്മർ പരിക്കിൽ നിന്നും മുക്തി നേടി വരികയാണ്. പക്ഷേ അടുത്ത മത്സരത്തിൽ നെയ്മർ കളിക്കുമോ എന്നുള്ളത് ഇപ്പോഴും അവ്യക്തമായ ഒരു കാര്യമാണ്. നെയ്മറുടെ അഭാവം പലപ്പോഴും ബ്രസീലിയൻ നിരയിൽ നിഴലിച്ചു കാണുന്നുണ്ടായിരുന്നു.ഏതായാലും പ്രീ ക്വാർട്ടർ പോലെയുള്ള ഒരു മത്സരത്തിൽ നെയ്മർ ഉണ്ടെങ്കിൽ അദ്ദേഹത്തിന്റെ സാന്നിധ്യം തന്നെ ബ്രസീലിന് വലിയ ഗുണകരമാവും.