അർജന്റീനക്ക് വേണ്ടിയുള്ള അരങ്ങേറ്റം, മനസ്സ് തുറന്ന് ക്രിസ്റ്റ്യൻ റൊമേറോ!

കഴിഞ്ഞ ചിലിക്കെതിരെയുള്ള വേൾഡ് കപ്പ് യോഗ്യത മത്സരത്തിൽ അർജന്റീന 1-1 എന്ന സ്കോറിന് സമനില വഴങ്ങിയിരുന്നു. ഈ മത്സരത്തിൽ ചില അർജന്റീന താരങ്ങൾക്ക് തങ്ങളുടെ ദേശീയ ടീമിനു വേണ്ടി അരങ്ങേറ്റം കുറിക്കാനുള്ള അവസരം ലഭിച്ചിരുന്നു. അത്തരത്തിലുള്ള ഒരു ഡിഫൻഡർ ക്രിസ്റ്റ്യൻ റൊമേറോ. ഈ സീസണിൽ സിരി എയിലെ ഏറ്റവും മികച്ച ഡിഫൻഡറായി തിരഞ്ഞെടുക്കപ്പെട്ട താരം അരങ്ങേറ്റത്തിൽ തന്നെ മികച്ച പ്രകടനമാണ് കാഴ്ച്ചവെച്ചത്. ഇപ്പോഴിതാ തനിക്ക് അരങ്ങേറാൻ സാധിച്ചതിലുള്ള സന്തോഷം പ്രകടിപ്പിച്ചിരിക്കുകയാണ് റൊമേറോ. ഇത് തന്റെ കരിയറിലെ ഏറ്റവും മികച്ച സമയമാണെന്നും തനിക്ക് വളരാനുള്ള സുവർണ്ണാവസരമാണ് കൈവന്നിരിക്കുന്നത് എന്നുമാണ് താരം പ്രസ്താവിച്ചത്. റൊമേറോയുടെ വാക്കുകൾ മുണ്ടോ ആൽബിസെലസ്റ്റ റിപ്പോർട്ട്‌ ചെയ്തിട്ടുണ്ട്.

” ചിലിക്കെതിരെയുള്ള മത്സരത്തിൽ ഞങ്ങൾ മികച്ചു നിന്നു എന്ന് തന്നെയാണ് ഞാൻ വിശ്വസിക്കുന്നത്. പക്ഷേ ഇനിയും വളരാനുണ്ട്. അത്‌ തന്നെയാണ് ഏറ്റവും പ്രധാനപ്പെട്ട കാര്യവും.ഈയൊരു അവസരം എനിക്ക് നൽകിയതിൽ കോച്ചിംഗ് സ്റ്റാഫിനോട് എനിക്ക് നന്ദിയുണ്ട്.അർജന്റീന ദേശീയ ടീമിന്റെ ജേഴ്‌സിയിൽ അരങ്ങേറാൻ സാധിച്ചതിൽ ഒരുപാട് സന്തോഷമുണ്ട്.ഞാൻ എത്തിയ ആദ്യ ദിവസം മുതൽ തന്നെ എനിക്കൊരുപാട് ആത്മവിശ്വാസം പകർന്നു നൽകിയ എന്റെ സഹതാരങ്ങളോട് ഞാൻ നന്ദി അറിയിക്കുകയാണ്. എന്റെ കരിയറിലെ ഏറ്റവും മികച്ച സമയമാണിത്. എനിക്ക് ഇനിയും വളരാനുള്ള ഏറ്റവും നല്ല അവസരമാണ് ഇതുവഴി ലഭിച്ചിരിക്കുന്നത്. ടീം എന്നെ സ്വീകരിച്ച രീതിയിലും അവരെന്നെ ട്രീറ്റ് ചെയ്യുന്ന രീതിയിലും എനിക്കൊരുപാട് സന്തോഷമുണ്ട് ” റൊമേറോ പറഞ്ഞു.