അവൻ പോയ ശേഷം മറ്റാരുമായും റൂം ഷെയർ ചെയ്യില്ല,ഖത്തറിലും മെസ്സി ഒറ്റക്ക്!

ഖത്തർ വേൾഡ് കപ്പിന് വേണ്ടിയുള്ള അർജന്റീനയുടെ ഒരുക്കങ്ങൾ ഇപ്പോൾ പുരോഗമിച്ചു കൊണ്ടിരിക്കുകയാണ്. ദോഹയിലെ ഖത്തർ യൂണിവേഴ്സിറ്റിയിലാണ് ഇപ്പോൾ അർജന്റീനക്ക് താമസസൗകര്യം ഒരുക്കിയിരിക്കുന്നത്.UAE ക്കെതിരെയുള്ള മത്സരത്തിന് ശേഷം അർജന്റീന ഇവിടെ എത്തുകയും ചെയ്തിരുന്നു.

ഇപ്പോഴിതാ പ്രമുഖ അർജന്റൈൻ മാധ്യമമായ Tyc സ്പോർട്സ് താരങ്ങളുടെ താമസസ്ഥലവുമായി ബന്ധപ്പെട്ട ചില വിവരങ്ങൾ പുറത്തുവിട്ടിട്ടുണ്ട്. യൂണിവേഴ്സിറ്റിയിലെ മോഡ്യൂൾ ഒന്നിലെ ബി-201 എന്ന റൂമിലാണ് സൂപ്പർ താരം ലയണൽ മെസ്സി താമസിക്കുന്നത്.മെസ്സിയുടെ റൂമിൽ മെസ്സി മാത്രമാണ് ഉള്ളത് എന്നതും ശ്രദ്ധേയമായ കാര്യമാണ്.

2011 മുതൽ മെസ്സിക്കൊപ്പം സ്ഥിരമായി റൂം ഷെയർ ചെയ്യുന്നത് സൂപ്പർതാരമായ സെർജിയോ അഗ്വേറോയായിരുന്നു. കഴിഞ്ഞ കോപ്പ അമേരിക്ക വരെയും മെസ്സിക്കൊപ്പം അഗ്വേറോ ഉണ്ടായിരുന്നു. എന്നാൽ ആരോഗ്യപ്രശ്നങ്ങൾ കാരണം അഗ്വേറോ വിരമിച്ചതോടുകൂടി മെസ്സി ഇപ്പോൾ ഏകാന്തനായി ഇരിക്കുകയാണ്. നിലവിൽ മെസ്സി ആരുമായും റൂം ഷെയർ ചെയ്യുന്നില്ല.

അതേസമയം മെസ്സിയുടെ തൊട്ടടുത്ത റൂമായ ബി-202ൽ നിക്കോളാസ്‌ ഓട്ടമെന്റിയും റോഡ്രിഗോ ഡി പോളുമാണ് താമസിക്കുന്നത്. മെസ്സിയുടെ റൂമിന്റെ തൊട്ട് മുന്നിലുള്ള റൂമായ ബി-204-ൽ എയ്ഞ്ചൽ ഡി മരിയയും ലിയാൻഡ്രോ പരേഡസുമാണ് സ്ഥാനം കണ്ടെത്തിയിട്ടുള്ളത്.

ഏതായാലും താമസ സൗകര്യങ്ങളെല്ലാം വളരെ മികച്ച രൂപത്തിൽ തന്നെയാണ് ഒരുക്കിയിട്ടുള്ളത്. എല്ലാവിധത്തിലുള്ള ഫെസിലിറ്റുകളും അർജന്റീനക്ക് ഖത്തർ യൂണിവേഴ്സിറ്റിയിൽ ലഭ്യമാണ്.