അന്നവർ എനിക്ക് വേൾഡ് കപ്പ് നേടിത്തന്നു,ഇന്നവർ നെയ്മർക്ക് വേണ്ടി അത് ചെയ്യണം : റൊമാരിയോ

വരുന്ന ഖത്തർ വേൾഡ് കപ്പിനുള്ള ഒരുക്കങ്ങളിലാണ് നിലവിൽ ബ്രസീൽ ടീം ഉള്ളത്. ഇറ്റലിയിലെ ടുറിനിൽ വെച്ചാണ് ബ്രസീൽ ഒരുക്കങ്ങൾ നടത്തുന്നത്.ടിറ്റെയും സംഘവും നേരത്തെ അവിടെ എത്തിയിരുന്നു. താരങ്ങൾ ഓരോരുത്തരായി എത്തി തുടങ്ങിയിട്ടുണ്ട്.

ഇത്തവണ കിരീട സാധ്യത കൽപ്പിക്കപ്പെടുന്ന ടീമാണ് ബ്രസീൽ. ഇനി മറ്റൊരു വേൾഡ് കപ്പിൽ താൻ കളിക്കുമോ എന്നുള്ള കാര്യത്തിൽ ഉറപ്പു നൽകാൻ കഴിയില്ല എന്നുള്ളത് സൂപ്പർതാരമായ നെയ്മർ ജൂനിയർ പറഞ്ഞിരുന്നു. ഇതുമായി ബന്ധപ്പെട്ട ഒരു പ്രസ്താവനായി ഇപ്പോൾ ബ്രസീലിയൻ ഇതിഹാസമായ റൊമാരിയോ നടത്തിയിട്ടുണ്ട്. അതായത് താരങ്ങൾ നെയ്മർക്ക് വേണ്ടി കളിക്കണമെന്നും നെയ്മർ താൻ ചെയ്യേണ്ടത് ചെയ്യണമെന്നുമാണ് റൊമാരിയോ പറഞ്ഞിട്ടുള്ളത്. അദ്ദേഹത്തിന്റെ വാക്കുകൾ ഇങ്ങനെയാണ്.

” 1994 വേൾഡ് കപ്പ് കിരീടം ബ്രസീൽ സ്വന്തമാക്കി.കാരണം എനിക്ക് വേണ്ടിയായിരുന്നു മറ്റുള്ള താരങ്ങൾ കളിച്ചത്.ഇപ്പോൾ ഖത്തറിലേക്ക് ബ്രസീൽ ടീം ആ ചിന്തയുമായാണ് പോകേണ്ടത്.അവർ ഇപ്പോൾ നെയ്മറിനായി കളിക്കണം. അതിനവർ തയ്യാറായിട്ടുമുണ്ട്. ഇനി നെയ്മർ എന്താണോ ചെയ്യേണ്ടത് അത് നെയ്മർ ചെയ്യുകയും വേണം ” ഇതാണ് റൊമാരിയോ പറഞ്ഞിട്ടുള്ളത്.

2002ലാണ് അവസാനമായി ബ്രസീൽ ഒരു വേൾഡ് കപ്പ് കിരീടം നേടിയിട്ടുള്ളത്. അതിനുശേഷം ഇപ്പോൾ 20 വർഷങ്ങൾ പിന്നിട്ടു കഴിഞ്ഞു. ഇത്തവണയെങ്കിലും ബ്രസീലിന് ആറാമത്തെ കിരീടം നേടാൻ കഴിയുമെന്നാണ് ആരാധകർ പ്രതീക്ഷിക്കുന്നത്.