അദ്ദേഹം ഒരു അനിമൽ:എമിയെ വാനോളം പ്രശംസിച്ച് ഡി പോൾ
ഇന്ന് കോപ്പ അമേരിക്കയിൽ നടന്ന ക്വാർട്ടർ ഫൈനൽ പോരാട്ടത്തിൽ വിജയം നേടാൻ വമ്പൻമാരായ അർജന്റീനക്ക് സാധിച്ചിരുന്നു. പെനാൽറ്റി ഷൂട്ടൗട്ടിലാണ് അർജന്റീന ഇക്വഡോറിനെ പരാജയപ്പെടുത്തിയത്.അർജന്റൈൻ ഗോൾകീപ്പർ എലിയാനോ മാർട്ടിനസിന്റെ മികവാണ് അവർക്ക് തുണയായത്.ഷൂട്ടൗട്ടിൽ രണ്ട് പെനാൽറ്റികൾ അദ്ദേഹം സേവ് ചെയ്യുകയായിരുന്നു.ഇതോടെ അർജന്റീന സെമിഫൈനൽ പ്രവേശനം സാധ്യമാക്കുകയും ചെയ്തു.
അർജന്റീനയുടെ ആദ്യത്തെ പെനാൽറ്റി അവരുടെ നായകനായ ലയണൽ മെസ്സി പാഴാക്കിയിരുന്നു. എന്നാൽ ഇക്വഡോറിന്റെ ആദ്യ രണ്ട് പെനാൽറ്റികളും സേവ് ചെയ്തുകൊണ്ട് എമി അവരുടെ രക്ഷകനായി മാറുകയായിരുന്നു.എമിയെ വാനോളം പ്രശംസിച്ചുകൊണ്ട് സൂപ്പർ താരം റോഡ്രിഗോ ഡി പോൾ ഇപ്പോൾ രംഗത്ത് വന്നിട്ടുണ്ട്.എമി ഒരു അനിമലാണ് എന്നാണ് ഇദ്ദേഹം പറഞ്ഞിട്ടുള്ളത്.ഡി പോളിന്റെ വാക്കുകൾ ഇങ്ങനെയാണ്.
“എമി ഒരു അനിമലാണ്. അദ്ദേഹം ചെയ്യുന്ന കാര്യങ്ങൾ ഭ്രാന്തവും അവിശ്വസനീയമാണ്.തീർച്ചയായും ഇതൊക്കെ അദ്ദേഹം അർഹിക്കുന്നു.ഈ ജേഴ്സി അണിയുന്നത് അദ്ദേഹം വളരെയധികം ഇഷ്ടപ്പെടുന്നു.ഞങ്ങൾക്ക് ഒരുപാട് സുരക്ഷിതത്വവും സമാധാനവും അദ്ദേഹം നൽകുന്നു. ഇത്തരം ഘട്ടങ്ങളിൽ അദ്ദേഹം എപ്പോഴും ഞങ്ങൾക്ക് വേണ്ടി അവിടെയുണ്ടാകും” ഇതാണ് ഡി പോൾ പറഞ്ഞിട്ടുള്ളത്.
പ്രതീക്ഷക്കൊത്തുള്ള ഒരു പ്രകടനം പുറത്തെടുക്കാൻ ഈ മത്സരത്തിൽ അർജന്റീനക്ക് സാധിച്ചിട്ടില്ല എന്നുള്ളത് യാഥാർത്ഥ്യമാണ്. പക്ഷേ ഒരിക്കൽ കൂടി എമി അവരുടെ രക്ഷകനായി മാറുകയായിരുന്നു. ഇനി മറ്റൊരു ക്വാർട്ടർ ഫൈനൽ പോരാട്ടത്തിൽ കാനഡയും വെനിസ്വേലയും തമ്മിലാണ് ഏറ്റുമുട്ടുക.ആ മത്സരത്തിലെ വിജയികളെയാണ് അർജന്റീന നേരിടുക.
