അത്ഭുതപ്പെടുത്തുന്ന താരം മെസ്സിയല്ലാതെ മറ്റാര് : മാക്ക് ആല്ലിസ്റ്റർ പറയുന്നു

ഇന്ന് ഖത്തർ വേൾഡ് കപ്പിൽ നടക്കുന്ന ക്വാർട്ടർ ഫൈനൽ പോരാട്ടത്തിൽ അർജന്റീനയുടെ എതിരാളികൾ ഹോളണ്ടാണ്. ഇന്ന് രാത്രി ഇന്ത്യൻ സമയം 12:30നാണ് ഈയൊരു മത്സരം നടക്കുക. ലയണൽ മെസ്സി ഉൾപ്പെടെയുള്ള സൂപ്പർതാരങ്ങളെ ഇന്നത്തെ മത്സരത്തിൽ കളിക്കളത്തിൽ കാണാനാവും.

ഈ മത്സരത്തിനു മുന്നോടിയായുള്ള പത്രസമ്മേളനത്തിൽ പങ്കെടുത്തിരുന്നത് അലക്സിസ് മാക്ക് ആല്ലിസ്റ്ററായിരുന്നു. അർജന്റീനയുടെ ദേശീയ ടീമിൽ ഏറ്റവും കൂടുതൽ അത്ഭുതപ്പെടുത്തുന്ന താരം ആരാണ് എന്ന ഒരു ചോദ്യം അദ്ദേഹത്തോട് ചോദിക്കപ്പെട്ടിരുന്നു.മെസ്സി എന്ന് തന്നെയാണ് അദ്ദേഹം മറുപടി പറഞ്ഞിട്ടുള്ളത്. മെസ്സിയെക്കുറിച്ച് മാക്ക് ആല്ലിസ്റ്റർ പറഞ്ഞ വാക്കുകൾ ഇങ്ങനെയാണ്.

” ലയണൽ മെസ്സി ആരാണ് എന്നുള്ളത് നമുക്കെല്ലാവർക്കും അറിയാം. എല്ലാദിവസവും അദ്ദേഹം ഞങ്ങളെ അത്ഭുതപ്പെടുത്തുന്നു.അദ്ദേഹം ചെയ്യുന്ന കാര്യങ്ങൾ വിശ്വസിക്കാൻ പോലും പ്രയാസമുള്ളതാണ്. പരിശീലന വേളകളിലും മത്സരങ്ങളിലും അങ്ങനെ തന്നെയാണ്. തീർച്ചയായും ഈ ഗ്രൂപ്പ് അദ്ദേഹത്തെ സന്തോഷിപ്പിക്കുന്നു.അതാണ് ഞങ്ങളെ സംബന്ധിച്ചിടത്തോളം ഏറ്റവും പ്രധാനപ്പെട്ട കാര്യം ” ഇതാണ് മാക്ക് ആല്ലിസ്റ്റർ പറഞ്ഞിട്ടുള്ളത്.

അർജന്റീനയുടെ സ്റ്റാർട്ടിങ് ഇലവനിലെ സ്ഥിരസാന്നിധ്യമാണ് ഇപ്പോൾ അലക്സിസ് മാക്ക് ആല്ലിസ്റ്റർ. ഈ വേൾഡ് കപ്പിൽ ഗോൾ നേടാനും അദ്ദേഹത്തിന് കഴിഞ്ഞിട്ടുണ്ട്.