മത്സരഫലത്തിൽ നിരാശ, പക്ഷെ ബ്ലാസ്റ്റേഴ്‌സ് ഇനിയും മെച്ചപ്പെടും : കിബു വിക്കുന !

ഇന്നലെ നടന്ന മത്സരത്തിൽ അവസാനനിമിഷം സമനില വഴങ്ങാനായിരുന്നു കേരള ബ്ലാസ്റ്റേഴ്‌സിന്റെ വിധി. എതിരില്ലാത്ത രണ്ടു ഗോളുകൾക്ക്‌ മുന്നിട്ട് നിന്ന ബ്ലാസ്റ്റേഴ്‌സ് പിന്നീട് രണ്ടു ഗോളുകൾ വഴങ്ങിക്കൊണ്ട് ജയം കളഞ്ഞു കുളിക്കുകയായിരുന്നു. മത്സരത്തിൽ ബ്ലാസ്റ്റേഴ്‌സിന് വേണ്ടി സിഡോഞ്ച, ഗാരി ഹൂപ്പർ എന്നിവരാണ് ഗോളുകൾ നേടിയത്. എന്നാൽ രണ്ടാം പകുതിയിൽ ആപ്പിയ, സില്ല എന്നിവരിലൂടെ നോർത്ത് ഈസ്റ്റ് യുണൈറ്റഡ് തിരിച്ചടിക്കുകയായിരുന്നു. ഈ മത്സരത്തെ കുറിച്ച് സംസാരിച്ചിരിക്കുകയാണിപ്പോൾ പരിശീലകൻ കിബു വിക്കുന. മത്സരഫലം നിരാശപ്പെടുത്തുന്നത് ആണെന്നും എന്നാൽ ബ്ലാസ്റ്റേഴ്‌സ് നേരായ വഴിയിൽ തന്നെയാണ് എന്നുമാണ് ഇദ്ദേഹത്തിന്റെ പ്രസ്താവന. ടീമിന് അഡാപ്റ്റ് ചെയ്യാൻ കുറച്ചു സമയം ആവിശ്യമുണ്ടെന്നും ബ്ലാസ്റ്റേഴ്‌സ് ഇനിയും മെച്ചപ്പെടുമെന്നുമാണ് വിക്കുന അറിയിച്ചത്. മത്സരശേഷം മാധ്യമങ്ങളോട് സംസാരിക്കുകയായിരുന്നു ഇദ്ദേഹം.

” ആദ്യ പകുതിയിൽ മികച്ച രീതിയിലാണ് ഞങ്ങൾ കളിച്ചത്. പലപ്പോഴും ബോൾ ഞങ്ങളുടെ നിയന്ത്രണത്തിലായിരുന്നു. എല്ലായിപ്പോഴും ഞങ്ങൾക്കായിരുന്നു ആധിപത്യം. പക്ഷെ അവരുടെ ആദ്യ ഗോളിന് ശേഷം എല്ലാം മാറിമറിഞ്ഞു. ഞങ്ങൾ ഞങ്ങളുടെ വഴിയിൽ നല്ല രീതിയിൽ തന്നെയാണ് ഉള്ളത്. അതേസമയം ഞങ്ങൾ നിരാശരുമാണ്. എന്തെന്നാൽ രണ്ടു പോയിന്റുകളാണ് ഞങ്ങൾക്ക്‌ നഷ്ടമായത്. തീർച്ചയായും ഞങ്ങൾക്ക്‌ അഡാപ്റ്റ് ചെയ്യാൻ സമയം ആവിശ്യമുണ്ട്. ഇന്നത്തെ മത്സരത്തിൽ മികച്ച പ്രകടനം തന്നെയാണ് ഞങ്ങൾ കാഴ്ച്ചവെച്ചത്. വരുന്ന ദിവസങ്ങളിൽ ഞങ്ങൾ ഇനിയും പുരോഗതി കൈവരിക്കും ” വിക്കുന പറഞ്ഞു.