പടിക്കൽ കലമുടച്ചു, കിബു വിക്കുന പ്രതികരിച്ചത് ഇങ്ങനെ !

ഇന്നലെ ഐഎസ്എല്ലിൽ നടന്ന മത്സരത്തിൽ അവസാനനിമിഷം സമനില വഴങ്ങാനായിരുന്നു കേരള ബ്ലാസ്റ്റേഴ്‌സിന്റെ വിധി. മത്സരം അവസാനിക്കാൻ ഒരു മിനുട്ട് മാത്രം ശേഷിക്കുന്ന വരെ ഒരു ഗോളിന് മുന്നിട്ട് നിന്ന ബ്ലാസ്റ്റേഴ്‌സ് പടിക്കൽ കലമുടക്കുകയാണ് ചെയ്തത്. ഇതോടെ നിർണായകമായ രണ്ട് പോയിന്റുകൾ ആണ് ബ്ലാസ്റ്റേഴ്‌സ് നഷ്ടപ്പെടുത്തി കഴിഞ്ഞത്. മത്സരത്തിന്റെ 64-ആം മിനുട്ടിൽ ഗോൾകീപ്പർ ആൽബിനോ ഗോമസിന്റെ അസിസ്റ്റിൽ നിന്നും ജോർദാൻ മുറെയാണ് ബ്ലാസ്റ്റേഴ്‌സിന്റെ ഗോൾ കണ്ടെത്തിയത്. എന്നാൽ മത്സരം അവസാനിക്കാൻ നിമിഷങ്ങൾ മാത്രം ബാക്കി നിൽക്കെ സ്കോട്ട് നെവില്ലെയാണ് ഈസ്റ്റ്‌ ബംഗാളിന് സമനില നേടികൊടുത്തത്. ഈ മത്സരഫലത്തിൽ താൻ തൃപ്തനല്ല എന്നറിയിച്ചിരിക്കുകയാണ് പരിശീലകൻ കിബു വിക്കുന. ബ്ലാസ്റ്റേഴ്‌സ് രണ്ട് പോയിന്റുകൾ കളഞ്ഞു കുളിക്കുകയാണ് ചെയ്തതെന്നും വിക്കുന അറിയിച്ചു.

” ഇതൊരു ബുദ്ധിമുട്ടേറിയ കാര്യമാണ്. എന്തെന്നാൽ മൂന്ന് പോയിന്റുകൾ ഞങ്ങൾക്ക്‌ ലഭിക്കേണ്ടതായിരുന്നു. പക്ഷെ മത്സരത്തിന്റെ അവസാനം ഞങ്ങൾക്ക്‌ രണ്ട് പോയിന്റുകൾ നഷ്ടമായി. രണ്ടാം പകുതിയിൽ ഞങ്ങളെക്കാൾ കൂടുതൽ പന്ത് കൈവശം വെച്ചത് അവരാണ്. പക്ഷെ ഞങ്ങളെ പോലെയുള്ള സുവർണ്ണാവസരങ്ങൾ അവർക്ക്‌ ലഭിച്ചിരുന്നില്ല. ഞങ്ങൾക്ക്‌ ഒരുപാട് നല്ല അവസരങ്ങൾ ലഭിച്ചു. ഒരു ഗോളും നേടി. ഞങ്ങൾ മൂന്ന് പോയിന്റ് നേടുന്നതിന്റെ തൊട്ടരികിൽ എത്തി കഴിഞ്ഞിരുന്നു. പക്ഷെ ഇതൊരു കഠിനമായ സമയമാണ്. എന്തെന്നാൽ പോയിന്റ് ടേബിളിൽ മുന്നോട്ട് കയറണമെങ്കിൽ തുടർച്ചയായ രണ്ട് മത്സരങ്ങളിൽ ഞങ്ങൾക്ക്‌ വിജയം ആവിശ്യമായിരുന്നു ” കിബു വിക്കുന പറഞ്ഞു.