ടീമിന്റെ പ്രകടനത്തിൽ സന്തോഷം, പിഴച്ചതെവിടെയെന്ന് വ്യക്തമാക്കി കിബു വിക്കുന !

ഇന്നലെ നടന്ന ആദ്യ ഐഎസ്എൽ പോരാട്ടത്തിൽ തന്നെ തലകുനിച്ചു മടങ്ങാനായിരുന്നു കേരള ബ്ലാസ്റ്റേഴ്‌സിന്റെ വിധി. മത്സരത്തിൽ ആശ്വാസകരമായ പ്രകടനമാണ് ബ്ലാസ്റ്റേഴ്‌സിന്റെ ഭാഗത്തു നിന്നുണ്ടായെങ്കിലും വീണു കിട്ടിയ ഒരേയൊരു അവസരം എടികെ മോഹൻ ബഗാൻ മുതലെടുത്തതോടെ ബ്ലാസ്റ്റേഴ്‌സ് പരാജയം രുചിക്കുകയായിരുന്നു. മത്സരത്തിൽ ബ്ലാസ്റ്റേഴ്‌സ് നല്ല പ്രകടനമാണ് കാഴ്ച്ചവെച്ചതെന്ന് എടികെ പരിശീലകൻ ലോപസ് ഹബാസ് അറിയിച്ചിരുന്നു. ഇതിന് പിന്നാലെ ടീമിന്റെ പ്രകടനത്തിൽ സന്തോഷം അറിയിച്ചിരിക്കുകയാണ് പരിശീലകൻ കിബു വിക്കുന. നിർഭാഗ്യം കൊണ്ടു മാത്രമാണ് ആ ഗോൾ പിറന്നതെന്നും ടീമിന്റെ പ്രകടനത്തിൽ താൻ സംതൃപ്തനാണ് എന്നുമാണ് കിബു വിക്കുന അറിയിച്ചത്. കിട്ടിയ അവസരങ്ങൾ മുതലെടുക്കാനാവാതെ പോയതാണ് ബ്ലാസ്റ്റേഴ്‌സിന് തിരിച്ചടിയായതെന്നും മുന്നേറ്റനിരയിൽ കുറച്ചു കൂടെ മികവ് പുലർത്തണമായിരുന്നുവെന്നും വിക്കുന കൂട്ടിച്ചേർത്തു.

” ഞങ്ങളെ കൊണ്ടു സാധിക്കും വിധം ഞങ്ങൾ ഈ മത്സരത്തിന് വേണ്ടി തയ്യാറായിരുന്നു. ഈ മത്സരത്തിന് വ്യക്തമായ പ്ലാൻ ഞങ്ങൾക്ക്‌ ഉണ്ടായിരുന്നു. ടീമിന്റെ പ്രകടനത്തിൽ ഞങ്ങൾ സന്തോഷവാൻമാരാണ്. നിർഭാഗ്യവശാൽ ഞങ്ങൾക്ക്‌ തോൽവി അറിയേണ്ടി വന്നു. നിർഭാഗ്യത്തിന്റെ പുറത്താണ് അവർ ആ ഗോൾ നേടിയത്. ഞങ്ങൾ ചില അവസരങ്ങൾ ഉണ്ടാക്കിയെടുത്തിരുന്നു. പക്ഷെ ഞങ്ങൾക്ക്‌ അത് മുതലെടുക്കാൻ സാധിച്ചില്ല. ഏതായാലും ഇനി ഞങ്ങൾ ശ്രദ്ദിക്കേണ്ടത് അടുത്ത മത്സരത്തെ കുറിച്ചാണ്. എനിക്ക് തോന്നുന്നത് ഞങ്ങൾക്ക്‌ മുന്നേറ്റനിരയിൽ ഒന്നുകൂടെ മികച്ച രീതിയിൽ കളിക്കാമായിരുന്നു എന്നാണ്. ഡിഫൻസിലും മിഡ്‌ഫീൽഡിലും പന്ത് ഞങ്ങളുടെ കൈവശമായിരുന്നു. പക്ഷെ ഫൈനൽ തേർഡിലേക്ക് അതിനെ ഉപയോഗപ്പെടുത്താൻ കഴിഞ്ഞില്ല. ഞങ്ങൾ ഇനി പുരോഗതി പ്രാപിക്കാൻ ശ്രമിക്കുക തന്നെ ചെയ്യും ” വിക്കുന പറഞ്ഞു.