കട്ടിമണി തടസ്സമായി,മൂന്നാമതും കിരീടം കൈവിട്ട് ബ്ലാസ്റ്റേഴ്സ്!

ഐഎസ്എല്ലിൽ പടിക്കൽ കലമുടക്കൽ തുടർന്ന് കേരള ബ്ലാസ്റ്റേഴ്സ്. മൂന്നാം തവണയും കേരള ബ്ലാസ്റ്റേഴ്സിന് ഫൈനലിൽ അടിതെറ്റി. ഇത്തവണ ഹൈദരാബാദ് എഫ്സിയാണ് ബ്ലാസ്റ്റേഴ്സിനെ ഫൈനലിൽ പരാജയപ്പെടുത്തിയത്.പെനാൽറ്റി ഷൂട്ടൗട്ടിലാണ് കേരള ബ്ലാസ്റ്റേഴ്സ് കിരീടം കൈവിട്ടത്.ഇതോടെ ഹൈദരാബാദിന് കന്നി കിരീടം നേടാനും സാധിച്ചു.

നിശ്ചിത സമയത്ത് ഇരു ടീമുകളും ഓരോ ഗോളുകൾ വീതം നേടി സമനിലയിൽ പിരിയുകയായിരുന്നു. മത്സരത്തിന്റെ 69-ആം മിനുട്ടിൽ മലയാളി താരം രാഹുൽ കെപി ഒരു തകർപ്പൻ ലോങ്ങ് റേഞ്ചിലൂടെ ഗോൾ നേടുകയായിരുന്നു.എന്നാൽ 88-ആം മിനുട്ടിൽ സാഹിൽ ടവോറ ഒരു തകർപ്പൻ ഷോട്ടിലൂടെ ഹൈദരാബാദിന്റെ സമനില ഗോൾ നേടുകയായിരുന്നു. പല സമയങ്ങളിലും ബ്ലാസ്റ്റേഴ്സിനെ നിർഭാഗ്യം വേട്ടയാടി.

മത്സരത്തിന്റെ അധിക സമയത്ത് ഇരു ടീമുകൾക്കും ഗോളുകൾ നേടാൻ കഴിഞ്ഞില്ല. ഇതോടെയാണ് മത്സരം പെനാൽറ്റി ഷൂട്ടൗട്ടിലേക്ക് നീങ്ങിയത്.

എന്നാൽ ഹൈദരാബാദ് ഗോൾകീപ്പർ കട്ടിമണി ബ്ലാസ്റ്റേഴ്സിന് തടസ്സമാവുകയായിരുന്നു.ബ്ലാസ്റ്റേഴ്സിന്റെ മൂന്ന് താരങ്ങളുടെ പെനാൽറ്റി കട്ടിമണി തടഞ്ഞിടുകയായിരുന്നു.

ലെസ്ക്കോവിച്ച്,നിഷു കുമാർ, ജീക്ക്സൺ സിംഗ് എന്നിവരുടെ പെനാൽറ്റികളാണ് കട്ടിമണി തടഞ്ഞിട്ടത്.ഇതോടെ പെനാൽറ്റിയിൽ 3-1 എന്ന സ്കോറിന് ബ്ലാസ്റ്റേഴ്സ് പരാജയം രുചിക്കുകയായിരുന്നു.