ഇതൊരു തുടക്കം മാത്രം : ബ്ലാസ്റ്റേഴ്‌സിന്റെ വിജയത്തിൽ കബ്രക്ക് പറയാനുള്ളത്!

ഇന്നലെ നടന്ന മത്സരത്തിൽ ഒഡീഷയെ എതിരില്ലാത്ത രണ്ട് ഗോളുകൾക്ക് പരാജയപ്പെടുത്തി കൊണ്ടാണ് ബ്ലാസ്റ്റേഴ്‌സ് ഈ സീസണിലെ ആദ്യ ജയം കുറിച്ചത്. ആൽവരോ വാസ്‌കസും പ്രശാന്തും നേടിയ ഗോളുകളാണ് ബ്ലാസ്റ്റേഴ്‌സിന് ജയം സമ്മാനിച്ചത്. എടുത്തു പറയേണ്ടത് അഡ്രിയാൻ ലൂണയുടെ രണ്ട് അസിസ്റ്റുകളുമാണ്. മികച്ച പ്രകടനമായിരുന്നു ലൂണ ഈ മത്സരത്തിൽ പുറത്തെടുത്തത്.

ഏതായാലും ഈ വിജയത്തിൽ ബ്ലാസ്റ്റേഴ്‌സിന്റെ സൂപ്പർ താരമായ ഹർമൻജോത് കബ്ര സന്തോഷം പ്രകടിപ്പിച്ചിട്ടുണ്ട്. ലക്ഷകണക്കിന് ആരാധകർ തങ്ങളുടെ പിറകിൽ ഉണ്ടെന്നും ഇതൊരു തുടക്കം മാത്രമാണെന്നും ഇനിയും ഒരുപാട് ദൂരം മുന്നോട്ടുപോകാനുണ്ടെന്നുമാണ് കബ്ര അറിയിച്ചിട്ടുള്ളത്. അദ്ദേഹത്തിന്റെ വാക്കുകളെ ഐഎസ്എൽ ഒഫീഷ്യൽ വെബ്സൈറ്റ് റിപ്പോർട്ട് ചെയ്യുന്നത് ഇങ്ങനെയാണ്.

” ഞങ്ങളെ പിന്തുണക്കുന്ന ലക്ഷക്കണക്കിന് ആരാധകർ ഞങ്ങൾക്കുണ്ട്. തീർച്ചയായും അപ്പോൾ പ്രതീക്ഷകൾ ഉണ്ടാവുമെന്നുള്ളത് സ്വാഭാവികമാണ്. ഡ്രസിംഗ് റൂമിലെ അറ്റ്മോസ്ഫിയർ എപ്പോഴും ഉയർന്ന് തന്നെയാണ്. പക്ഷേ ഇതിൽ ഞങ്ങൾ ഒന്ന് കരുതേണ്ടതുണ്ട്. ഇതൊരു തുടക്കം മാത്രമാണ്. ഇനിയും ഒരുപാട് ദൂരം മുന്നോട്ട് പോകേണ്ടതുണ്ട്. പക്ഷേ എപ്പോഴും നമ്മൾ വിനയാന്വിത രാവണം ” കബ്ര പറഞ്ഞു.

നിലവിൽ പോയിന്റ് ടേബിളിൽ ആറാം സ്ഥാനത്താണ് കേരള ബ്ലാസ്റ്റേഴ്സുള്ളത്. ഇനി ഈസ്റ്റ് ബംഗാളിനെതിരെയാണ് ബ്ലാസ്റ്റേഴ്സിന്റെ അടുത്ത മത്സരം.