അപരാജിത കുതിപ്പിന് വിരാമം,ബ്ലാസ്റ്റേഴ്സിന് തോൽവി!

കേരള ബ്ലാസ്റ്റേഴ്സിന്റെ ഈ സീസണിലെ അപരാജിത കുതിപ്പിന് വിരാമമായി.കഴിഞ്ഞ പത്ത് മത്സരങ്ങളിൽ തോൽവി അറിയാത്ത ബ്ലാസ്റ്റേഴ്സിന് ബംഗ്ളൂരു എഫ്സിക്ക് മുന്നിലാണ് കാലിടറിയത്. ഏകപക്ഷീയമായ ഒരു ഗോളിനാണ് കേരള ബ്ലാസ്റ്റേഴ്സ് പരാജയപ്പെട്ടത്.രണ്ടാം പകുതിയിൽ റോഷൻ സിംഗ് നേടിയ ഗോളാണ് ബംഗളൂരുവിന് വിജയം സമ്മാനിച്ചത്.

പെരീര ഡയസ്,അൽവാരോ വാസ്ക്കസ്,സഹൽ,ലൂണ തുടങ്ങിയ പ്രധാനപ്പെട്ട താരങ്ങളെല്ലാം ബ്ലാസ്റ്റേഴ്സിന് വേണ്ടി കളത്തിലേക്ക് ഇറങ്ങിയിരുന്നു.എന്നാൽ ഗോളുകൾ മാത്രം നേടാനായില്ല. മത്സരത്തിന്റെ 56-ആം മിനുട്ടിൽ ഒരു തകർപ്പൻ ഫ്രീകിക്കിലൂടെയാണ് റോഷൻ സിംഗ് ഗോൾ നേടിയത്. ഈ ഗോളിന് മറുപടി നൽകാൻ ബ്ലാസ്റ്റേഴ്സിന് കഴിയാതെ വരികയായിരുന്നു.

തോൽവി വഴങ്ങിയെങ്കിലും ബ്ലാസ്റ്റേഴ്സ് മൂന്നാം സ്ഥാനത്തു തന്നെ തുടരുകയാണ്.12 മത്സരങ്ങളിൽ നിന്ന് 20 പോയിന്റാണ് ബ്ലാസ്റ്റേഴ്സിന്റെ സമ്പാദ്യം.14 മത്സരങ്ങളിൽനിന്ന് ഇത്രയും പോയിന്റുള്ള BFC നാലാം സ്ഥാനത്താണ്.