യുവന്റസ് സൂപ്പർ താരത്തെ ടീമിലെത്തിക്കാൻ ശ്രമം നടത്തി ബയേൺ!

ഈ ട്രാൻസ്ഫർ ജാലകത്തിലായിരുന്നു ബയേണിന്റെ റൈറ്റ് ബാക്കായ ഡേവിഡ് അലാബ ക്ലബ് വിട്ടു കൊണ്ട് റയലിലേക്ക് ചേക്കേറിയത്. അത്കൊണ്ട് തന്നെ ആ പൊസിഷനിലേക്ക് മറ്റൊരു താരത്തെ എത്തിക്കാനുള്ള ശ്രമത്തിലാണ് ബയേൺ പരിശീലകനായ ജൂലിയൻ നഗെൽസ്മാൻ. ഇപ്പോഴിതാ യുവന്റസിന്റെ ബ്രസീലിയൻ റൈറ്റ് ബാക്കായ ഡാനിലോയിൽ ബയേൺ താല്പര്യം പ്രകടിപ്പിച്ചിട്ടുണ്ട്.താരത്തിന് വേണ്ടി ബയേൺ യുവന്റസിനെ സമീപിച്ചുവെങ്കിലും യുവന്റസ് ഓഫർ നിരസിച്ചിട്ടുണ്ട്.ഡാനിലോക്ക്‌ വേണ്ടി 30 മില്യൺ യൂറോയെങ്കിലും നൽകണമെന്നാണ് യുവന്റസിന്റെ ആവിശ്യം.സ്കൈ സ്പോർട്ട് ഇറ്റാലിയയാണ് ഈയൊരു വാർത്ത ഫുട്ബോൾ ലോകത്തെ അറിയിച്ചിട്ടുള്ളത്.

2019 ഓഗസ്റ്റിലായിരുന്നു ഡാനിലോ മാഞ്ചസ്റ്റർ സിറ്റിയിൽ നിന്നും യുവന്റസിൽ എത്തിയത്.പകരം ജോവോ കാൻസെലോ സിറ്റിയിലേക്ക് ചേക്കേറുകയും ചെയ്തിരുന്നു.ഇതുവരെ യുവന്റസിന് വേണ്ടി 78 മത്സരങ്ങൾ കളിക്കാൻ ഈ ബ്രസീലിയൻ താരത്തിന് സാധിച്ചിട്ടുണ്ട്. കൂടാതെ ഈ കഴിഞ്ഞ കോപ്പ അമേരിക്കയിൽ ഫൈനലിൽ എത്തിയ ബ്രസീൽ ടീമിന്റെ ഭാഗമാവാനും ഡാനിലോക്ക്‌ സാധിച്ചിരുന്നു.ഏതായാലും ചുരുങ്ങിയത് 30 മില്യൺ യൂറോയെങ്കിലും ലഭിക്കാതെ ഡാനിലോയെ കൈവിടില്ല എന്ന നിലപാടാണ് യുവന്റസ് സ്വീകരിച്ചിരിക്കുന്നത്. ഈ തുക നൽകാൻ ബയേൺ തയ്യാറാവുമോ എന്നുള്ളത് കണ്ടറിയേണ്ട കാര്യമാണ്.സാന്റോസ്, പോർട്ടോ, റയൽ എന്നീ ക്ലബുകൾക്ക്‌ വേണ്ടിയും ഡാനിലോ കളിച്ചിട്ടുണ്ട്.