കളി തോറ്റു,മെസ്സി ചാന്റ് നടത്തിയവർക്ക് നേരെ അശ്ലീല ആംഗ്യം കാണിച്ച് ക്രിസ്റ്റ്യാനോ!

ഇന്നലെ സൗദി അറേബ്യൻ ലീഗിൽ നടന്ന ചിരവൈരികളുടെ പോരാട്ടത്തിൽ ക്രിസ്റ്റ്യാനോ റൊണാൾഡോയുടെ ക്ലബായ അൽ നസ്റിന് തോൽവി രുചിക്കേണ്ടി വന്നിരുന്നു. എതിരില്ലാത്ത രണ്ട് ഗോളുകൾക്കാണ് അൽ നസ്റിനെ അൽ ഹിലാൽ പരാജയപ്പെടുത്തിയത്.ഇഗ്‌ഹാലോ പെനാൽറ്റിയിലൂടെ നേടിയ ഇരട്ട ഗോളുകളാണ് അൽ ഹിലാലിന് വിജയം സമ്മാനിച്ചിട്ടുള്ളത്.

ഈ മത്സരത്തിൽ ക്രിസ്റ്റ്യാനോ റൊണാൾഡോ ഉണ്ടായിരുന്നുവെങ്കിലും അദ്ദേഹത്തിന് കാര്യമായി ഒന്നും ചെയ്യാൻ സാധിച്ചിരുന്നില്ല. മാത്രമല്ല ഇപ്പോൾ മോശം പ്രകടനമാണ് അദ്ദേഹത്തിന്റെ ക്ലബ്ബ് നടത്തുന്നതും.അതുകൊണ്ടുതന്നെ അദ്ദേഹം വളരെയധികം നിരാശനാണ്. ഇതിനിടെ ഇന്നലെ അൽ ഹിലാൽ ആരാധകർ അദ്ദേഹത്തെ പ്രകോപിപ്പിക്കുകയും ചെയ്തിരുന്നു.

അതായത് മത്സരശേഷം റൊണാൾഡോ ഡ്രസിങ് റൂമിലേക്ക് നടന്നുവരുന്ന സമയത്ത് മെസ്സിയുടെ പേര് ചാന്റ് ചെയ്തുകൊണ്ടായിരുന്നു അൽ ഹിലാൽ ആരാധകർ അദ്ദേഹത്തെ പ്രകോപിപ്പിച്ചത്. എന്നാൽ ഈ പ്രകോപനത്തിന് അദ്ദേഹം മറുപടി നൽകിയത് അശ്ലീല ആംഗ്യത്തിലൂടെയാണ്. അതിന്റെ വീഡിയോ സാമൂഹിക മാധ്യമങ്ങളിൽ വൈറലാവുകയും ചെയ്തിരുന്നു.

ദിവസങ്ങൾക്കു മുന്നേയായിരുന്നു അവർ പരിശീലകനായ റൂഡി ഗാർഷ്യയെ പുറത്താക്കിയത്. താൽക്കാലിക പരിശീലകനായ ഡിങ്കോക്ക് കീഴിലാണ് ഈ മത്സരം അൽ നസ്ർ കളിച്ചത്. ഈ മത്സരവും തോറ്റതോടുകൂടി ക്ലബ്ബിന്റെ കിരീട പ്രതീക്ഷകൾ ഏതാണ്ട് അവസാനിച്ചിരിക്കുകയാണ്.