ഗോൾവേട്ട ആരംഭിച്ച് ഹാലന്റ്, തകർപ്പൻ ജയത്തോടെ ബൊറൂസിയ തുടങ്ങി !

ബുണ്ടസ്ലിഗയിൽ ഇന്നലെ നടന്ന ആദ്യ റൗണ്ട് പോരാട്ടത്തിൽ കരുത്തരായ ബൊറൂസിയ ഡോർട്മുണ്ടിന് വിജയം. എതിരില്ലാത്ത മൂന്ന് ഗോളുകൾക്കാണ് ബൊറൂസിയ മോൺചെൻഗ്ലാഡ്ബാച്ചിനെ തറപ്പറ്റിച്ചു വിട്ടത്. ഇരുടീമുകളും ഒപ്പത്തിനൊപ്പം നിന്ന മത്സരമായിരുന്നു അരങ്ങേറിയിരുന്നുവെങ്കിലും കിട്ടിയ അവസരങ്ങൾ മുതലെടുത്തു കൊണ്ട് ബൊറൂസിയ വിജയം കരസ്ഥമാക്കുകയായിരുന്നു. പുതിയ സീസണിലും സൂപ്പർ താരം ഹാലന്റ് പതിവ് തെറ്റിച്ചില്ല. ഇരട്ടഗോളുകൾ നേടികൊണ്ടാണ് താരം സീസണിന് തുടക്കം കുറിച്ചത്. ജയത്തോടെ മൂന്ന് പോയിന്റുകൾ കരസ്ഥമാക്കാൻ ബൊറൂസിയക്കായി.

ഹാലന്റ്, സാഞ്ചോ, റെയ്‌ന എന്നീ താരങ്ങൾക്കായിരുന്നു ആക്രമണചുമതല. മത്സരത്തിന്റെ മുപ്പത്തിയഞ്ചാം മിനുട്ടിലാണ് റെയ്‌ന ബൊറൂസിയയുടെ അക്കൗണ്ട് തുറക്കുന്നത്. ബെല്ലിങ്ഹാമിന്റെ പാസിൽ നിന്നായിരുന്നു താരം ഗോൾ കണ്ടെത്തിയത്. പിന്നീട് പെനാൽറ്റിയിലൂടെ ഹലാന്റിന്റെ ഗോൾ വന്നു. മത്സരത്തിന്റെ അൻപത്തിനാലാം മിനുട്ടിൽ ലഭിച്ച പെനാൽറ്റിയാണ് ഹാലന്റ് വിജയകരമായി പൂർത്തിയാക്കിയത്. 77-ആം മിനുട്ടിൽ ഹാലന്റ് തന്നെ ഗോൾപട്ടിക പൂർത്തിയാക്കി. ജേഡൻ സാഞ്ചോ നടത്തിയ കൌണ്ടർ അറ്റാക്കിനൊടുവിൽ ഹാലന്റ് ഫിനിഷ് ചെയ്യുകയായിരുന്നു. ഇനി അടുത്ത റൗണ്ട് പോരാട്ടം ഓഗ്സ്ബർഗിനോടാണ്.അതേ സമയം എതിരാളികളായ ബയേൺ എട്ട് ഗോൾ നേടി കൊണ്ട് ബുണ്ടസ്ലിഗക്ക് തുടക്കം കുറിച്ചിരുന്നു.