മെസ്സിയുടെ കാര്യത്തിൽ കൂടുതൽ ശ്രദ്ധവേണം; അർജന്റീനയ്ക്ക് മുൻ സഹതാരത്തിന്റെ മുന്നറിയിപ്പ്
വരാനിരിക്കുന്ന ഫിഫ ലോകകപ്പിൽ ലയണൽ മെസ്സിയുടെ വർക്ക് ലോഡ് (മത്സര സമയം) കൈകാര്യം ചെയ്യുന്നതിൽ അർജന്റീന ടീം അതീവ ജാഗ്രത പുലർത്തണമെന്ന് മുൻ അർജന്റീന താരം ജുവാൻ സെബാസ്റ്റ്യൻ വെറോൺ. മെസ്സി എല്ലാ മത്സരങ്ങളും പൂർണ്ണമായി കളിക്കുമെന്ന് പ്രതീക്ഷിക്കുന്നത് യുക്തിസഹമല്ലെന്നും, ഈ ഘട്ടത്തിൽ താരം മറ്റുള്ളവരുടെ സഹായം സ്വീകരിക്കാൻ തയാറാകണമെന്നും വെറോൺ ഓർമ്മിപ്പിച്ചു.
വെറോണിന്റെ വാക്കുകൾ ഇങ്ങനെയായിരുന്നു:
“ലോകകപ്പിലെ മെസ്സിയുടെ കാര്യത്തിൽ നമ്മൾ അതീവ ശ്രദ്ധ പുലർത്തേണ്ടതുണ്ട്. അദ്ദേഹം എല്ലാ മത്സരങ്ങളും കളിക്കുമെന്നാണ് നമ്മൾ കരുതുന്നതെങ്കിൽ അതിൽ അർത്ഥമില്ല. മെസ്സി ഇപ്പോൾ മറ്റുള്ളവരുടെ സഹായം സ്വീകരിക്കാൻ (ടീമിന്റെ ഒത്തൊരുമിച്ചുള്ള കളിക്ക് വഴിമാറാൻ) തയാറാകണം. മാനസികമായി അത് സ്വീകരിക്കുക എന്നത് കഠിനമായ കാര്യമായിരിക്കാം.”
പ്രായം നൽകുന്ന ശാരീരിക വെല്ലുവിളികൾ മെസ്സിയെ ബാധിക്കാൻ സാധ്യതയുണ്ടെന്ന് വെറോൺ ചൂണ്ടിക്കാണിക്കുന്നു. എങ്കിലും ടൂർണമെന്റിന്റെ പാതിവഴിയിൽ മെസ്സി തന്റെ പഴയ ഫോമിലേക്ക് പൂർണ്ണമായി തിരിച്ചെത്തിയാൽ പിന്നീട് അദ്ദേഹത്തെ തടയാൻ ആർക്കും കഴിയില്ലെന്നും, എന്നാൽ ശാരീരികക്ഷമത നിലനിർത്തുക എന്നത് തന്നെയാണ് ഏറ്റവും വലിയ വെല്ലുവിളിയെന്നും മുൻ താരം കൂട്ടിച്ചേർത്തു. മെസ്സിയുടെ അവസാന ലോകകപ്പാകാൻ സാധ്യതയുള്ള ടൂർണമെന്റിൽ അദ്ദേഹത്തെ എങ്ങനെ മികച്ച രീതിയിൽ ഉപയോഗിക്കാം എന്നതിനെക്കുറിച്ചുള്ള കൃത്യമായ വിശകലനമാണ് വെറോൺ പങ്കുവെച്ചിരിക്കുന്നത്.
