പെരസിൻ്റെ ആരോപണങ്ങൾക്ക് മറുപടിയുമായി ബാഴ്സ …!
ഫുട്ബോൾ ലോകത്തെ പിടിച്ചുലച്ചുകൊണ്ട് റയൽ മാഡ്രിഡ് പ്രസിഡന്റ് ഫ്ലോറന്റിനോ പെരെസ് ഉന്നയിച്ച ഗുരുതരമായ ആരോപണങ്ങൾക്ക് മറുപടിയുമായി എഫ്സി ബാഴ്സലോണ രംഗത്തെത്തിയിരിക്കുകയാണ്. പെരെസിന്റെ പ്രസ്താവനകളെ അതീവ ഗൗരവത്തോടെയാണ് ക്ലബ്ബ് കാണുന്നതെന്ന് ബാഴ്സലോണ പുറത്തിറക്കിയ ഔദ്യോഗിക പ്രസ്താവനയിൽ വ്യക്തമാക്കുന്നു.
പെരെസ് ഉന്നയിച്ച പ്രസ്താവനകളും ആരോപണങ്ങളും ബാഴ്സലോണയുടെ നിയമവിഭാഗം സസൂക്ഷ്മം പരിശോധിച്ചു വരികയാണ്. ഈ പ്രസ്താവനകളെ ആഴത്തിൽ വിശകലനം ചെയ്തുകൊണ്ടിരിക്കുകയാണെന്നും, ഇതിന്മേൽ സ്വീകരിക്കേണ്ട അടുത്ത ഘട്ടങ്ങളെക്കുറിച്ച് ക്ലബ്ബ് ആലോചിച്ചുവരികയാണെന്നും അറിയിച്ചിട്ടുണ്ട്. ഉചിതമായ സമയത്ത്, ക്ലബ്ബിന്റെ കൃത്യമായ നിലപാടുകളെക്കുറിച്ചും എടുക്കുന്ന തീരുമാനങ്ങളെക്കുറിച്ചും എല്ലാവരെയും ഔദ്യോഗികമായി അറിയിക്കുന്നതാണ്.
സ്പാനിഷ് ഫുട്ബോളിലെ വസന്മാരായ ഇരു ക്ലബ്ബുകൾക്കുമിടയിൽ നിലനിൽക്കുന്ന തർക്കങ്ങൾ പുതിയ തലത്തിലേക്ക് നീങ്ങുകയാണെന്ന് ഈ ഔദ്യോഗിക നീക്കം സൂചിപ്പിക്കുന്നു. നിയമപരമായ പോരാട്ടത്തിലേക്കോ മറ്റ് കടുത്ത തീരുമാനങ്ങളിലേക്കോ ബാഴ്സലോണ നീങ്ങുമോ എന്നാണ് ഇപ്പോൾ ഫുട്ബോൾ ആരാധകർ ഉറ്റുനോക്കുന്നത്.
