പരിക്കുകളും മറ്റു പ്രശ്നങ്ങളും, അർജന്റീന ടീമിൽ മാറ്റങ്ങൾക്ക് സാധ്യത!

കഴിഞ്ഞ ഇന്റർനാഷണൽ ബ്രേക്കിൽ 2 വേൾഡ് കപ്പ് യോഗ്യത മത്സരങ്ങളായിരുന്നു അർജന്റീന കളിച്ചിരുന്നത്. ആദ്യ മത്സരത്തിൽ വെനിസ്വേലയോട് അവർ സമനില വഴങ്ങുകയായിരുന്നു.എന്നാൽ രണ്ടാമത്തെ മത്സരത്തിൽ അവർ വിജയവഴിയിലേക്ക് തിരിച്ചെത്തി. എതിരില്ലാത്ത ആറ് ഗോളുകൾക്കായിരുന്നു അവർ ബൊളീവിയയെ പരാജയപ്പെടുത്തിയത്.

ഇനി ഇത്തവണത്തെ ഇന്റർനാഷണൽ ബ്രേക്കിൽ 2 വേൾഡ് കപ്പ് യോഗ്യതാ മത്സരങ്ങൾ കൂടി അർജന്റീന കളിക്കുന്നുണ്ട്.നവംബർ പതിനഞ്ചാം തീയതി നടക്കുന്ന മത്സരത്തിൽ പരാഗ്വയാണ് അർജന്റീനയുടെ എതിരാളികൾ. പിന്നീട് 5 ദിവസത്തിനു ശേഷം പെറുവിനെയാണ് അർജന്റീന നേരിടുക. ഈ മത്സരങ്ങൾക്കുള്ള സ്‌ക്വാഡിനെ തിരഞ്ഞെടുക്കാനുള്ള തയ്യാറെടുപ്പുകൾ ഇപ്പോൾ അർജന്റീനയുടെ പരിശീലകനായ ലയണൽ സ്‌കലോണി ആരംഭിച്ചിട്ടുണ്ട്. ഇതുമായി ബന്ധപ്പെട്ട ഒരു റിപ്പോർട്ട് Tyc സ്പോർട്സ് പുറത്ത് വിടുകയും ചെയ്തിട്ടുണ്ട്.

പരിക്കിന്റെ പ്രശ്നങ്ങൾ ഉള്ളതുകൊണ്ടു തന്നെ അർജന്റീന ടീമിൽ മാറ്റങ്ങൾ ഉണ്ടാവാൻ സാധ്യതയുണ്ട് എന്നാണ് ഇവരുടെ റിപ്പോർട്ട് സൂചിപ്പിക്കുന്നത്. പരിക്ക് കാരണം കഴിഞ്ഞ ഇന്റർനാഷണൽ ബ്രേക്കിൽ പങ്കെടുക്കാത്തത് മൂന്ന് താരങ്ങളായിരുന്നു.പൗലോ ദിബാല,ഗർനാച്ചോ,മാർക്കോസ് അക്യുഞ്ഞ എന്നിവരായിരുന്നു ആ മൂന്നു താരങ്ങൾ.ഈ മൂന്ന് താരങ്ങളും പരിക്കിൽ നിന്നും മുക്തരായിട്ടുണ്ട്. വരുന്ന സ്‌ക്വാഡിൽ ഇവർ ഇടം നേടുമെന്നാണ് പ്രതീക്ഷിക്കപ്പെടുന്നത്.

ദിബാല കഴിഞ്ഞ മത്സരത്തിൽ റോമക്ക് വേണ്ടി ഗോളടിച്ചിട്ടുണ്ട്. കൂടാതെ ഗർനാച്ചോ കഴിഞ്ഞ മത്സരത്തിൽ ഒരു ഗോളും അസിസ്റ്റും സ്വന്തമാക്കിയിട്ടുണ്ട്. അതുകൊണ്ടുതന്നെ ഈ താരങ്ങളുടെ കാര്യത്തിൽ പരിശീലകനായ സ്‌കലോണിക്ക് ആശങ്കകൾ ഒന്നുമില്ല.നിക്കോളാസ് ഗോൺസാലസ് പരിക്കിന്റെ പിടിയിലായിരുന്നുവെങ്കിലും ഇപ്പോൾ ഓക്കെയായിട്ടുണ്ട് എന്നാണ് റിപ്പോർട്ടുകൾ.അദ്ദേഹവും ടീമിൽ ഇടം നേടും. എന്നാൽ ലോ ചെൽസോയുടെ കാര്യത്തിലാണ് ഇപ്പോൾ സംശയങ്ങൾ ഉള്ളത്.

പൂർണ്ണമായും പരിക്കിൽ നിന്നും മുക്തനാവാൻ അദ്ദേഹത്തിന് കഴിഞ്ഞിട്ടില്ല. അതുകൊണ്ടുതന്നെ കൂടുതൽ പരിശോധനകൾക്ക് വിധേയമാക്കിയതിനുശേഷമായിരിക്കും അദ്ദേഹത്തിന്റെ കാര്യത്തിൽ അർജന്റീന തീരുമാനം എടുക്കുക.ഏതായാലും ഇത്രയും താരങ്ങളുടെ കാര്യത്തിലുള്ള അപ്ഡേറ്റുകളാണ് ഇപ്പോൾ ലഭിച്ചിട്ടുള്ളത്. ചെറിയ ചില മാറ്റങ്ങൾ സ്‌കലോണി സ്‌ക്വാഡിൽ വരുത്തും എന്ന് തന്നെയാണ് അറിയാൻ സാധിക്കുന്നത്.