എംബപ്പേ ഗോളടിച്ച് കൂട്ടും, ഒരു സംശയവും വേണ്ട: പിന്തുണച്ച് വിനി!

സൂപ്പർ താരം കിലിയൻ എംബപ്പേ റയൽ മാഡ്രിഡിന് വേണ്ടി അരങ്ങേറിയത് യുവേഫ സൂപ്പർ കപ്പ് ഫൈനലിലായിരുന്നു. മത്സരത്തിൽ ഒരു ഗോൾ നേടാൻ അദ്ദേഹത്തിന് കഴിഞ്ഞിരുന്നു. എന്നാൽ പിന്നീട് ലാലിഗയിൽ രണ്ടു മത്സരങ്ങൾ അദ്ദേഹം കളിച്ചു.എന്നാൽ ഗോളുകൾ ഒന്നും നേടാൻ കഴിഞ്ഞിരുന്നില്ല. മാത്രമല്ല ചില ഗോളവസരങ്ങൾ അദ്ദേഹം പാഴാക്കുകയും ചെയ്തിരുന്നു.ഇതോടെ താരത്തിന് വിമർശനങ്ങളെ നേരിടേണ്ടിവന്നു.

എന്നാൽ തന്റെ സഹതാരത്തെ പിന്തുണച്ചുകൊണ്ട് രംഗത്തുവന്നിരിക്കുകയാണ് ബ്രസീലിയൻ സൂപ്പർ താരമായ വിനീഷ്യസ് ജൂനിയർ.എംബപ്പേ ഒരുപാട് ഗോളുകൾ നേടുമെന്ന് തന്നെയാണ് വിനി പറഞ്ഞിട്ടുള്ളത്. റയൽ മാഡ്രിഡ് അൺസസ്റ്റോപ്പബിളാണെന്ന് എല്ലാവരും കരുതുന്നുവെന്നും അതിലേക്ക് തങ്ങൾ എത്തിപ്പെടേണ്ടതുണ്ടെന്നും വിനി പറഞ്ഞിട്ടുണ്ട്.അദ്ദേഹത്തിന്റെ വാക്കുകൾ ഇങ്ങനെയാണ്.

“എംബപ്പേ കളി ശൈലിയെ ഞാൻ വളരെയധികം ഇഷ്ടപ്പെടുന്നു.ഈ സീസണിൽ അദ്ദേഹത്തിന് എന്തൊക്കെ ചെയ്യാൻ കഴിയുമെന്നതിൽ ഞാൻ വളരെയധികം എക്സൈറ്റഡ് ആണ്.ഒരുപാട് ഗോളുകളും കിരീടങ്ങളും ഒക്കെ നേടിയതിനുശേഷമാണ് അദ്ദേഹം ഇവിടേക്ക് എത്തുന്നത്. അദ്ദേഹം സ്വപ്നം കണ്ട ക്ലബ്ബിനു വേണ്ടിയാണ് കളിച്ചു കൊണ്ടിരിക്കുന്നത്. തീർച്ചയായും ദൈവ സഹായത്താൽ എംബപ്പേ ഒരുപാട് ഗോളുകൾ നേടും. മുൻപ് ദേശീയ ടീമിലും ക്ലബ്ബുകളിലും എല്ലാം അദ്ദേഹം അത് കാണിച്ചിട്ടുണ്ട്. ഞങ്ങളോടൊപ്പം അതിനേക്കാൾ കൂടുതൽ ചെയ്യാൻ അദ്ദേഹത്തിന് സാധിക്കും.ടീം നല്ല നിലയിൽ തന്നെയാണുള്ളത്.എംബപ്പേ വന്നതോടെ ടീം അൺസ്റ്റോപ്പബിളാണെന്ന് എല്ലാവരും പറയുന്നുണ്ട്.പക്ഷേ ഞങ്ങൾ ട്രെയിനിങ്ങിൽ മികച്ച പ്രകടനം നടത്തി മെച്ചപ്പെടേണ്ടതുണ്ട് എത്രയും പെട്ടെന്ന് പരസ്പരം ധാരണ ഉണ്ടാക്കിയെടുക്കണം ” ഇതാണ് വിനി പറഞ്ഞിട്ടുള്ളത്.

റയൽ മാഡ്രിഡ് അടുത്ത മത്സരത്തിൽ ലാസ് പാൽമസിനെയാണ് നേരിടുക.നാളെ രാത്രി ഇന്ത്യൻ സമയം ഒരു മണിക്കാണ് ഈ മത്സരം നടക്കുക.ലാസ് പാൽമസിന്റെ മൈതാനത്ത് വെച്ച് നടക്കുന്ന ഈ മത്സരത്തിൽ എംബപ്പേ ആദ്യ ലീഗ് ഗോൾ നേടും എന്നാണ് പ്രതീക്ഷിക്കപ്പെടുന്നത്