ക്രിസ്റ്റ്യാനോ ഗോളുകൾ നേടാൻ വേണ്ടി ജീവിക്കുന്ന ഒരാൾ: പ്രതികരണവുമായി പെപേ

സൂപ്പർ താരം ക്രിസ്റ്റ്യാനോ റൊണാൾഡോ തന്റെ ആറാമത്തെ യൂറോ കപ്പിലാണ് ഇപ്പോൾ പങ്കെടുത്തു കൊണ്ടിരിക്കുന്നത്.ഈ യൂറോ കപ്പിലെ മൂന്ന് മത്സരങ്ങളിലും റൊണാൾഡോ കളിച്ചിട്ടുണ്ട്.എന്നാൽ അദ്ദേഹത്തിന് ഗോളുകൾ ഒന്നും നേടാൻ കഴിഞ്ഞിട്ടില്ല എന്നത് ആരാധകർക്ക് നിരാശ നൽകുന്ന കാര്യമാണ്.ഒരു അസിസ്റ്റ് അദ്ദേഹം സ്വന്തമാക്കിയിട്ടുണ്ട്. കഴിഞ്ഞ മത്സരത്തിൽ ജോർജിയയോട് പോർച്ചുഗൽ പരാജയപ്പെട്ടു എന്നുള്ളതും ആരാധകർക്ക് ആശങ്ക നൽകുന്ന കാര്യമാണ്.

ക്രിസ്റ്റ്യാനോ റൊണാൾഡോ ഗോൾ അടിക്കാത്തതിനെ കുറിച്ച് അദ്ദേഹത്തിന്റെ സഹതാരമായ പെപേയോട് ചോദിക്കപ്പെട്ടിരുന്നു. വരുന്ന മത്സരങ്ങളിൽ റൊണാൾഡോ ഗോൾ നേടും എന്നുള്ള ഒരു ശുഭാപ്തി വിശ്വാസം ഇദ്ദേഹം പ്രകടിപ്പിച്ചിട്ടുണ്ട്. ഗോളുകൾ നേടാൻ വേണ്ടി ജീവിക്കുന്ന ഒരാളാണ് ക്രിസ്റ്റ്യാനോയെന്നും പെപേ പറഞ്ഞിട്ടുണ്ട്. അദ്ദേഹത്തിന്റെ വാക്കുകളെ ESPN റിപ്പോർട്ട് ചെയ്തിരിക്കുന്നത് ഇങ്ങനെയാണ്.

” ഗോളുകൾ നേടാൻ വേണ്ടി ജീവിക്കുന്ന ഒരാളാണ് ക്രിസ്റ്റ്യാനോ റൊണാൾഡോ.അതൊരു വസ്തുതയാണ്. അദ്ദേഹം കളത്തിൽ ഉണ്ടാവുമ്പോൾ എല്ലാം ദേശീയ ടീമിനെ അദ്ദേഹം സഹായിക്കുന്നത് നിങ്ങൾ കാണുന്നില്ലേ?ഞങ്ങളുടെ ടീമിൽ ഏറ്റവും കൂടുതൽ മിനുട്ടുകൾ കളിച്ച താരം അദ്ദേഹമാണ്.അത് അവിശ്വസനീയമാണ്.39 ആമത്തെ വയസ്സിലും മികച്ച രൂപത്തിലാണ് അദ്ദേഹം മുന്നോട്ട് പോകുന്നത്. തീർച്ചയായും യൂറോകപ്പിന്റെ നോക്കോട്ട് ഘട്ടത്തിൽ അദ്ദേഹത്തിൽ നിന്നും മികച്ച പ്രകടനങ്ങൾ വരും. അദ്ദേഹം നമുക്ക് ആഘോഷിക്കാനുള്ള സാഹചര്യങ്ങൾ ഉണ്ടാക്കി തരും എന്ന് തന്നെയാണ് ഞാൻ വിശ്വസിക്കുന്നത് “ഇതാണ് റൊണാൾഡോയുടെ സഹതാരം പറഞ്ഞിട്ടുള്ളത്.

നിലവിൽ യൂറോ കപ്പിന്റെ പ്രീ ക്വാർട്ടറിൽ സ്ലോവേനിയയെ നേരിടാനുള്ള ഒരുക്കത്തിലാണ് പോർച്ചുഗൽ ഉള്ളത്.വരുന്ന തിങ്കളാഴ്ച അർദ്ധരാത്രിയാണ് ഈ മത്സരം നടക്കുക. മത്സരത്തിൽ ക്രിസ്റ്റ്യാനോ റൊണാൾഡോ സ്റ്റാർട്ട് ചെയ്യും എന്ന് തന്നെയാണ് പ്രതീക്ഷിക്കപ്പെടുന്നത്. നിലവിലെ ഗോൾഡൻ ബൂട്ട് ജേതാവായ ക്രിസ്റ്റ്യാനോക്ക് അത് നിലനിർത്തുക എന്നത് ഇനി ഒരല്പം ബുദ്ധിമുട്ടുള്ള കാര്യമായിരിക്കും.