ബ്രസീലിനെ പൂട്ടി വെനിസ്വേല, ഒറ്റ ഗോൾ വിജയവുമായി അർജന്റീന.

വേൾഡ് കപ്പ് യോഗ്യത റൗണ്ടിൽ ഇന്ന് നടന്ന മൂന്നാമത്തെ മത്സരത്തിൽ വമ്പൻമാരായ ബ്രസീലിന് സമനിലക്കുരുക്ക്.വെനിസ്വേലയാണ് ബ്രസീലിനെ സമനിലയിൽ തളച്ചത്.രണ്ട് ടീമുകളും ഓരോ ഗോളുകൾ വീതം നേടുകയായിരുന്നു. ബ്രസീലിന് വേണ്ടി ഗബ്രിയേലായിരുന്നു ഹെഡറിലൂടെ ലീഡ് നേടിക്കൊടുത്തത്.

എന്നാൽ 85ആം മിനുട്ടിൽ ബല്ലോ ഒരു ബൈസിക്കിൾ കിക്ക് ഗോളിലൂടെ വെനിസ്വേലയെ ഒപ്പമെത്തിച്ചു. പിന്നീട് ഗോളുകൾ ഒന്നും പിറക്കാതെ വന്നതോടെ മത്സരം സമനിലയിൽ കലാശിക്കുകയായിരുന്നു. നിരവധി ഗോളവസരങ്ങൾ ലഭിച്ചുവെങ്കിലും അത് മുതലെടുക്കാൻ സാധിക്കാതെ പോയത് ബ്രസീലിന് തിരിച്ചടിയായി.

അതേസമയം അർജന്റീന ഇന്നത്തെ മൂന്നാം റൗണ്ട് പോരാട്ടത്തിൽ വിജയം സ്വന്തമാക്കിയിട്ടുണ്ട്. ഏകപക്ഷീയമായ ഒരു ഗോളിനാണ് അർജന്റീന പരാഗ്വയെ പരാജയപ്പെടുത്തിയത്.നിക്കോളാസ് ഓട്ടമെന്റി മത്സരത്തിന്റെ തുടക്കത്തിൽ തന്നെ നേടിയ ഗോളാണ് അർജന്റീനക്ക് വിജയം സമ്മാനിച്ചത്.

ലയണൽ മെസ്സി പകരക്കാരനായി കൊണ്ടായിരുന്നു മത്സരത്തിൽ ഇറങ്ങിയത്. നിർഭാഗ്യം കൊണ്ടാണ് മെസ്സിക്ക് ഗോൾ നേടാനാവാതെ പോയത്. നിലവിൽ മൂന്ന് മത്സരങ്ങളിൽ മൂന്നിലും വിജയിച്ച അർജന്റീന ഒന്നാം സ്ഥാനത്താണ്. രണ്ടാം സ്ഥാനത്താണ് ബ്രസീൽ ഉള്ളത്.