PSGയിലേക്ക് പോവണം, ചെൽസിയുടെ ഓഫർ നിരസിച്ച് സൂപ്പർ സ്ട്രൈക്കർ!

യുവന്റസിന്റെ സെർബിയൻ സൂപ്പർ സ്ട്രൈക്കറായ ഡുസാൻ വ്ലഹോവിച്ച് ക്ലബ്ബ് വിടാനുള്ള ഒരുക്കത്തിലാണ്.നിരവധി ക്ലബ്ബുകൾ അദ്ദേഹത്തിൽ താല്പര്യം പ്രകടിപ്പിച്ചുകൊണ്ട് രംഗത്ത് വന്നിട്ടുണ്ട്. ഇംഗ്ലീഷ് പ്രീമിയർ ലീഗ് വമ്പൻമാരായ ചെൽസി, ഫ്രഞ്ച് ചാമ്പ്യന്മാരായ പിഎസ്ജി എന്നിവരാണ് പ്രധാനമായും ഈ താരത്തിന് വേണ്ടി ശ്രമിക്കുന്നത്. ഈ താരത്തെ കൈവിടാൻ യുവന്റസ് തയ്യാറായിക്കഴിഞ്ഞിട്ടുണ്ട്.

എന്നാൽ വ്ലഹോവിച്ചുമായി ബന്ധപ്പെട്ട ഒരു വാർത്ത പ്രമുഖ മാധ്യമപ്രവർത്തകനായ ആൽഫ്രഡോ പെഡുല്ല റിപ്പോർട്ട് ചെയ്തിട്ടുണ്ട്. അതായത് ചെൽസിയുടെ ഓഫർ വ്ലഹോവിച്ച് നിരസിച്ചിട്ടുണ്ട്.അദ്ദേഹത്തിന് ചെൽസിയിലേക്ക് ചേക്കേറാൻ താല്പര്യമില്ല. അടുത്ത സീസണിൽ ചാമ്പ്യൻസ് ലീഗിൽ പങ്കെടുക്കാൻ സാധിക്കാത്ത ക്ലബ്ബാണ് ചെൽസി. ഈ കാരണവും വ്ലഹോവിച്ചിന്റെ തീരുമാനത്തിൽ വളരെയധികം സ്വാധീനം ചെലുത്തിയിട്ടുണ്ട്.

മറിച്ച് അദ്ദേഹം ഇപ്പോൾ പോകാൻ ആഗ്രഹിക്കുന്നത് പിഎസ്ജിയിലെക്കാണ്.പിഎസ്ജിക്ക് നിലവിൽ ഒരു സ്ട്രൈക്കറെ അത്യാവശ്യമായ സന്ദർഭമാണിത്. ഇംഗ്ലീഷ് സൂപ്പർ താരമായ ഹാരി കെയ്നിന് വേണ്ടിയാണ് അവർ പരമാവധി ശ്രമിക്കുന്നത്. പക്ഷേ കെയ്നിന് പാരീസിലേക്ക് വരാൻ താല്പര്യമില്ല. മറിച്ച് അദ്ദേഹം പോകാൻ ഉദ്ദേശിക്കുന്നത് ജർമൻ വമ്പൻമാരായ ബയേൺ മ്യൂണിക്കിലെക്കാണ്.

കൂടാതെ വിക്ടർ ഒസിംഹനെ നല്ല രൂപത്തിൽ പിഎസ്ജി പരിഗണിക്കുന്നുണ്ട്,അദ്ദേഹത്തിന് വേണ്ടി ശ്രമങ്ങൾ നടത്തുന്നുമുണ്ട്. പക്ഷേ ഭീമമായ തുകയാണ് നാപോളി ആവശ്യപ്പെടുന്നത് എന്നുള്ളത് മാത്രമല്ല ഒരു ചില്ലിക്കാശ് പോലും കുറക്കാൻ നാപോളി തയ്യാറായിട്ടുമില്ല. അതുകൊണ്ടുതന്നെ വ്ലഹോവിച്ച് പിഎസ്ജിയിൽ എത്താനുള്ള സാധ്യത കൂടുതലാണ്. കഴിഞ്ഞ സീസണിൽ ലീഗിൽ 27 മത്സരങ്ങൾ കളിച്ച ഈ താരം 10 ഗോളുകളും രണ്ട് അസിസ്റ്റുകളുമാണ് യുവന്റസിന് വേണ്ടി സ്വന്തമാക്കിയിട്ടുള്ളത്.