ഞാൻ ബാഴ്സയെ ഇഷ്ടപ്പെടുന്നു: ക്ലബ്ബിലേക്ക് തിരിച്ചെത്തുമെന്ന സൂചന നൽകി മുൻ സൂപ്പർതാരം!

2022ലെ സമ്മർ ട്രാൻസ്ഫർ വിൻഡോയിലായിരുന്നു സൂപ്പർ താരം ഒബമയാങ് ആഴ്സണലിനോട് വിടപറഞ്ഞുകൊണ്ട് സ്പാനിഷ് വമ്പൻമാരായ എഫ്സി ബാഴ്സലോണയിൽ എത്തിയത്.ആഴ്സണലിന് വേണ്ടി മികച്ച പ്രകടനമായിരുന്നു അദ്ദേഹം അതുവരെ നടത്തിയിരുന്നത്. 163 മത്സരങ്ങൾ ആകെ അവർക്ക് വേണ്ടി കളിച്ച ഈ താരം 92 ഗോളുകൾ സ്വന്തമാക്കിയിരുന്നു. അതിനുശേഷമായിരുന്നു ബാഴ്സയിൽ എത്തിയത്.

ബാഴ്സയിലും ഈ മികവ് തുടരാൻ അദ്ദേഹത്തിന് സാധിച്ചു. ആകെ കളിച്ച 24 മത്സരങ്ങളിൽ നിന്ന് 13 ഗോളുകൾ അദ്ദേഹം നേടിയിരുന്നു.പക്ഷേ കഴിഞ്ഞ സമ്മർ ട്രാൻസ്ഫർ വിൻഡോയിൽ അദ്ദേഹത്തിന് ക്ലബ് വിടേണ്ടി വരികയായിരുന്നു. മറ്റൊരു പ്രീമിയർ ലീഗ് വമ്പൻമാരായ ചെൽസിയിലേക്കാണ് ഒബമയാങ് എത്തിയിരുന്നത്. പക്ഷേ ചെൽസിയിൽ നല്ല രീതിയിലല്ല കാര്യങ്ങൾ പുരോഗമിച്ചത്.

ഈ സീസണിൽ 21 മത്സരങ്ങളാണ് ചെൽസിക്ക് വേണ്ടി അദ്ദേഹം കളിച്ചിട്ടുള്ളത്.അതിൽനിന്ന് കേവലം മൂന്ന് ഗോളുകൾ മാത്രമാണ് താരം നേടിയിട്ടുള്ളത്. അതുകൊണ്ടുതന്നെ വരുന്ന ട്രാൻസ്ഫർ വിൻഡോയിൽ ക്ലബ്ബ് വിടാനുള്ള ഒരുക്കത്തിലാണ് ഒബമയാങ് ഉള്ളത്.ഏത് ക്ലബ്ബിലേക്ക് പോകാനാണ് ഉദ്ദേശിക്കുന്നത് എന്ന ചോദ്യം അദ്ദേഹത്തോട് ചോദിക്കപ്പെട്ടിരുന്നു. ബാഴ്സയിലേക്ക് മടങ്ങാൻ താൻ താല്പര്യപ്പെടുന്നു എന്ന ഒരു സൂചനയാണ് അദ്ദേഹം നൽകിയിട്ടുള്ളത്. താരത്തിന്റെ വാക്കുകൾ ഇങ്ങനെയാണ്.

” അടുത്ത ക്ലബ്ബ് ഏതാണ് എന്നതിനെക്കുറിച്ച് എനിക്കിപ്പോൾ യാതൊരുവിധ ധാരണയുമില്ല.നമുക്ക് കാത്തിരുന്നു കാണാം. ഞാൻ ബാഴ്സയെ ഇഷ്ടപ്പെടുന്നുണ്ട് ” ഇതാണ് ഒബമയാങ്‌ പറഞ്ഞിട്ടുള്ളത്.പക്ഷേ താരത്തെ തിരികെ എത്തിക്കാൻ ബാഴ്സ ശ്രമിക്കുമോ എന്നുള്ള കാര്യത്തിൽ സംശയങ്ങൾ നിലനിൽക്കുന്നുണ്ട്. എന്തെന്നാൽ നിലവിൽ ലയണൽ മെസ്സിയെയാണ് ബാഴ്സ തിരികെ എത്തിക്കാൻ ഏറ്റവും കൂടുതൽ ശ്രമിക്കുന്നത്. കൂടാതെ ഗുണ്ടോഗൻ,കാൻസെലോ എന്നിവരെ എത്തിക്കാനും ബാഴ്സ ശ്രമിക്കുന്നുണ്ട്.