ക്രിസ്റ്റ്യാനോയോ നെയ്മറോ ന്യൂകാസിലിലേക്ക് എത്തുമോ? തുറന്ന് പറഞ്ഞ് പരിശീലകൻ!

ഇംഗ്ലീഷ് പ്രീമിയർ ലീഗ് ക്ലബായ ന്യൂകാസിൽ യുണൈറ്റഡിനെ സൗദി പബ്ലിക് ഇൻവെസ്റ്റ്മെന്റ് ഫണ്ട് ഏറ്റെടുത്തതോടുകൂടി നിരവധി റൂമറുകളാണ് പുറത്തേക്ക് വരുന്നത്. നിലവിൽ സാമ്പത്തികപരമായി ന്യൂകാസിൽ യുണൈറ്റഡ് വളരെയധികം ശക്തരാണ്. അതുകൊണ്ടുതന്നെ ഫുട്ബോൾ ലോകത്തെ സൂപ്പർ താരങ്ങളെ സ്വന്തമാക്കുക എന്നുള്ളത് ക്ലബ്ബിനെ സംബന്ധിച്ചിടത്തോളം ബുദ്ധിമുട്ടുള്ള ഒരു കാര്യമായിരിക്കില്ല.ക്രിസ്റ്റ്യാനോ റൊണാൾഡോയോ നെയ്മർ ജൂനിയറോ വരുന്ന സമ്മർ ട്രാൻസ്ഫർ വിൻഡോയിൽ ന്യൂകാസിലിൽ എത്തും എന്നുള്ള അഭ്യൂഹങ്ങൾ വളരെ വ്യാപകമാണ്.

ന്യൂകാസിൽ പരിശീലകനായ എഡ്ഢി ഹോവിനോട് ഈ ട്രാൻസ്ഫർ റൂമറുകളെ കുറിച്ച് ചോദിക്കപ്പെട്ടിരുന്നു.എന്നാൽ ഇത്തരത്തിലുള്ള റൂമറുകൾ സ്വാഭാവികമാണ് എന്നാണ് ഇദ്ദേഹം പ്രതികരിച്ചിട്ടുള്ളത്. വളരെ ശ്രദ്ധയോടുകൂടി മാത്രമാണ് തങ്ങൾ സൈനിങ്ങുകൾ നടത്തുകയെന്നും ഈ പരിശീലകൻ കൂട്ടിച്ചേർത്തിട്ടുണ്ട്. അദ്ദേഹത്തിന്റെ വാക്കുകളെ ഗോൾ ഡോട്ട് കോം റിപ്പോർട്ട് ചെയ്യുന്നത് ഇങ്ങനെയാണ്.

” ക്ലബ്ബിനെ പുതിയ ഉടമസ്ഥർ വന്ന അന്ന് മുതൽ ഇത്തരത്തിലുള്ള റൂമറുകൾ സജീവമാണ്.തീർച്ചയായും ഭാവിയിൽ ഫുട്ബോൾ ലോകത്തെ ഏറ്റവും വലിയ പേരുകളിൽ ഒന്നായി മാറാൻ ന്യൂകാസിലിന് സാധിക്കും. അപ്പോൾ ഇത്തരത്തിലുള്ള റൂമറുകൾ സ്വാഭാവികമാണ്.പക്ഷേ ടീമിനെ ശരിയായ ആളുകളെ മാത്രമാണ് ഞങ്ങൾ ക്ലബ്ബിലേക്ക് എത്തിക്കുക.ട്രാൻസ്ഫർ മാർക്കറ്റ് എന്നുള്ളത് സങ്കീർണമായ ഒരു കാര്യമാണ്. ഒരുപാട് ചിന്തിച്ചതിന് ശേഷം മാത്രമാണ് ഞങ്ങൾ തീരുമാനങ്ങൾ എടുക്കുക.വെറുതെ ഒരു താരത്തെ ഞങ്ങൾ കൊണ്ടുവരില്ല. ആരൊക്കെയാണ് ഈ ട്രാൻസ്ഫർ റൂമറുകളിൽ ഉൾപ്പെട്ടിരിക്കുന്നത് എന്നുള്ളത് എനിക്കറിയില്ല. നിലവിൽ ഞങ്ങൾ ബാക്കിയുള്ള മത്സരങ്ങളിൽ ആണ് ശ്രദ്ധ പതിപ്പിച്ചിരിക്കുന്നത് ” ഇതാണ് ന്യൂകാസിൽ പരിശീലകൻ പറഞ്ഞിട്ടുള്ളത്.

ക്രിസ്റ്റ്യാനോ റൊണാൾഡോയുടെ പ്രായം പരിഗണിക്കുമ്പോൾ അദ്ദേഹം എത്താനുള്ള സാധ്യത കുറവാണ്. അതേസമയം നെയ്മറുമായി ബന്ധപ്പെടുത്തിക്കൊണ്ട് വളരെ സ്ട്രോങ്ങ് ആയിട്ടുള്ള റൂമറുകൾ തന്നെയാണ് പുറത്തേക്ക് വരുന്നത്. വരുന്ന സമ്മർ ട്രാൻസ്ഫറിൽ ക്ലബ്ബ് വിടാനുള്ള ഒരുക്കത്തിലുമാണ് നെയ്മർ.