എംബപ്പേയും മെസ്സിയും തിളങ്ങി,പിഎസ്ജിക്ക് വിജയം.

ഇന്നലെ ലീഗ് വണ്ണിൽ നടന്ന മത്സരത്തിൽ ഒന്നാം സ്ഥാനക്കാരായ പിഎസ്ജിക്ക് വിജയം. ഒന്നിനെതിരെ 2 ഗോളുകൾക്കാണ് പിഎസ്ജി ആങ്കേഴ്സിനെ പരാജയപ്പെടുത്തിയിട്ടുള്ളത്. രണ്ട് ഗോളുകളും നേടിയിട്ടുള്ള സൂപ്പർ താരം കിലിയൻ എംബപ്പേയാണ് പിഎസ്ജിയുടെ ഈ മത്സരത്തിലെ വിജയ ശില്പി.യുവാൻ ബെർണാട്ട്,ലയണൽ മെസ്സി എന്നിവരായിരുന്നു അസിസ്റ്റുകൾ നേടിയിരുന്നത്.

മത്സരത്തിന്റെ ഒമ്പതാം മിനിറ്റിൽ തന്നെ കിലിയൻ എംബപ്പേ ഗോൾ കണ്ടെത്തിയിരുന്നു.ബെർണാറ്റിന്റെ അസിസ്റ്റിൽ നിന്നായിരുന്നു എംബപ്പേയുടെ ഗോൾ പിറന്നിരുന്നത്. അതിനുശേഷം 26ആം മിനിട്ടിൽ ഒരു ഗോൾ കൂടി എംബപ്പേ സ്വന്തമാക്കുകയായിരുന്നു. ഇത്തവണ ലയണൽ മെസ്സിയുടെ അസിസ്റ്റിൽ നിന്നാണ് എംബപ്പേയുടെ ഗോൾ വന്നത്. മത്സരത്തിന്റെ ഏറ്റവും ഒടുവിൽ ആങ്കേഴ്സ് ഒരു ഗോൾ മടക്കിയെങ്കിലും പിഎസ്ജിയെ പിടിച്ചു കെട്ടാൻ അത് മതിയാകുമായിരുന്നില്ല.

ഒന്നാം സ്ഥാനത്ത് നിലവിൽ പിഎസ്ജി തന്നെയാണ് നിലകൊള്ളുന്നത്. 32 മത്സരങ്ങളിൽ നിന്ന് 75 പോയിന്റാണ് പിഎസ്ജിക്കുള്ളത്. ഒരു മത്സരം കുറച്ചു കളിച്ച മാഴ്സേ 64 പോയിന്റുമായി രണ്ടാം സ്ഥാനത്ത് ഉണ്ട്. 22 ഗോളുകളുമായി എംബപ്പേയാണ് ഫ്രഞ്ച് ലീഗിൽ ഏറ്റവും കൂടുതൽ ഗോളുകൾ നേടിയ താരം.അതേസമയം 15 അസിസ്റ്റുകൾ ഉള്ള ലയണൽ മെസ്സിയാണ് ഫ്രഞ്ച് ലീഗിൽ ഏറ്റവും കൂടുതൽ അസിസ്റ്റുകൾ ഉള്ള താരം.