സൂപ്പർ താരങ്ങൾ നിറഞ്ഞാടി, PSG ജയിച്ചത് 9 ഗോളുകൾക്ക്

ഇന്നലെ നടന്ന സൗഹൃദ മത്സരത്തിൽ PSGക്ക് തകർപ്പൻ ജയം. എതിരില്ലാത്ത 9 ഗോളുകൾക്കാണവർ ഫ്രഞ്ച് രണ്ടാം ഡിവിഷൻ ക്ലജായ ലെ ഹാവ്റെയെ തകർത്തത്. 4 മാസങ്ങൾക്ക് ശേഷം കളത്തിലിറങ്ങിയ PSGയുടെ സൂപ്പർ താരങ്ങളെല്ലാം മികച്ച പ്രകടനം പുറത്തെടുത്തു. നെയ്മർ ജൂനിയറും മൗറോ ഇക്കാർഡിയും ഇരട്ട ഗോളുകൾ നേടിയതിന് പുറമെ എംബപ്പേ കൂടി സ്കോർ ചെയ്തതോടെ എതിരില്ലാത്ത 5 ഗോളുകൾക്ക് ആദ്യ പകുതിയിൽ തന്നെ PSG മുന്നാലായി. തുടർന്ന് ഗോളടിച്ചവരെ അടക്കം 9 പേരെ സബ്സ്റ്റിറ്റ്യൂട്ട് ചെയ്തു കൊണ്ടാണ് തോമസ് ടുഷേൽ രണ്ടാം പകുതിയിൽ തൻ്റെ ടീമിനെ ഇറക്കിയത്. അതേ സമയം ആദ്യ പകുതിയിൽ കളിച്ച 11 പേരെയും മാറ്റി പുതിയ ഇലവനും കൊണ്ടാണ് ലെ ഹാവ്റെ രണ്ടാം പകുതി കളിക്കാനെത്തിയത്!

സൂപ്പർ താരങ്ങൾ കളം വിട്ടിട്ടും PSG ഗോളടി തുടർന്നു. രണ്ടാം പകുതിയിൽ പാബ്ലോ സറാബിയ ഇരട്ട ഗോളുകൾ നേടുകയും ഇദിരിസെ ഗുയെ, മുയിൻഗ എന്നിവർ ഓരോ ഗോളുകൾ വീതം സ്കോർ ചെയ്യുകയും ചെയ്തതോടെ എതിരില്ലാത്ത 9 ഗോളുകൾക്ക് വിജയിച്ച് PSG പരിശീലന മത്സരം ഗംഭീരമാക്കി. ഈ മാസം അവസാനം നടക്കുന്ന ഡൊമെസ്റ്റിക്ക് കപ്പ് ഫൈനലുകളും ഓഗസ്റ്റിലെ ചാമ്പ്യൻസ് ലീഗും ലക്ഷ്യമിട്ടാണ് PSG സൗഹൃദ മത്സരങ്ങൾ സംഘടിപ്പിക്കുന്നത്. ജൂലൈ 17ന് ബെൽജിയൻ ക്ലബ്ബ് വാസ്ലാൻഡ് ബെവെറെനുമായും ജൂലൈ 21ന് സ്കോട്ടിഷ് ക്ലബ്ബ് കെൽറ്റിക്കുമായും PSG ഫ്രണ്ട്ലി മത്സരങ്ങൾ കളിക്കുന്നുണ്ട്.