ബ്രസീൽ വേൾഡ് കപ്പിൽ നിന്നും പുറത്തായപ്പോൾ ഞങ്ങൾ വിജയിച്ച പോലെ ആഘോഷിച്ചു:കാരണ സഹിതം വിശദീകരിച്ച് പപ്പു ഗോമസ്.

ലാറ്റിനമേരിക്കൻ വമ്പൻമാരായ അർജന്റീനയുടെയും ബ്രസീലിന്റെയും ഖത്തർ വേൾഡ് കപ്പിലെ ക്വാർട്ടർ ഫൈനൽ മത്സരം ഒരേ ദിവസമായിരുന്നു അരങ്ങേറിയിരുന്നത്. ക്രൊയേഷ്യക്കെതിരെയുള്ള ക്വാർട്ടർ ഫൈനൽ മത്സരത്തിൽ ബ്രസീൽ പരാജയപ്പെട്ടു കൊണ്ട് വേൾഡ് കപ്പിൽ നിന്നും പുറത്താവുകയായിരുന്നു. അതിനുശേഷമാണ് അർജന്റീനയും ഹോളണ്ടും തമ്മിലുള്ള മത്സരം നടന്നത്.അതിൽ അർജന്റീന വിജയിച്ചു കൊണ്ട് സെമിയിലേക്ക് യോഗ്യത കരസ്ഥമാക്കുകയും ചെയ്തു.

അന്നേ ദിവസത്തെ ചില അനുഭവങ്ങൾ അർജന്റീനയുടെ സൂപ്പർതാരമായ പപ്പു ഗോമസ് ഇപ്പോൾ പങ്കുവെച്ചിട്ടുണ്ട്. അതായത് ബ്രസീൽ വേൾഡ് കപ്പിൽ നിന്നും പുറത്തായപ്പോൾ ഞങ്ങൾ വിജയിച്ചതുപോലെയാണ് തങ്ങൾ ആഘോഷിച്ചത് എന്നാണ് പപ്പു ഗോമസ് പറഞ്ഞിട്ടുള്ളത്.ബ്രസീൽ പുറത്തായപ്പോൾ തന്നെ ഞങ്ങൾ കിരീടം ഉറപ്പിച്ചിരുന്നു എന്നാണ് ഇതിന്റെ കാരണമായി കൊണ്ട് ഇദ്ദേഹം ചൂണ്ടിക്കാണിച്ചത്.പപ്പുവിന്റെ വാക്കുകളെ മുണ്ടോ ആൽബിസെലസ്റ്റ റിപ്പോർട്ട് ചെയ്യുന്നത് ഇങ്ങനെയാണ്.

” ഞങ്ങൾക്ക് വാം അപ്പിന് പോവാനുള്ള സമയമായിരുന്നു അപ്പോൾ. പക്ഷേ ഞങ്ങൾ ആ മത്സരം കണ്ടിരുന്നു.ബ്രസീലും ക്രൊയേഷ്യയും തമ്മിലുള്ള പെനാൽറ്റി ഷൂട്ടൗട്ട് കണ്ട സമയത്ത് ഞങ്ങൾ പറഞ്ഞത്,ബ്രസീൽ പുറത്തായി കഴിഞ്ഞാൽ ഈ വേൾഡ് കപ്പ് കിരീടം നമ്മുടേതാണ് എന്നുള്ളതാണ്. അങ്ങനെ ബ്രസീലിന് പുറത്താക്കിക്കൊണ്ട് ക്രൊയേഷ്യ വിജയിച്ചപ്പോൾ ഞങ്ങളെല്ലാവരും അത് ആഘോഷിച്ചു.ഞങ്ങൾ വിജയിച്ച പോലെയാണ് ഞങ്ങൾ അത് ആഘോഷിച്ചത്”പപ്പു ഗോമസ് പറഞ്ഞു.

പിന്നീട് ക്രൊയേഷ്യയും അർജന്റീനയും തമ്മിലായിരുന്നു സെമിയിൽ ഏറ്റുമുട്ടിയിരുന്നത്. ആ മത്സരത്തിൽ ഒരു തകർപ്പൻ വിജയം നേടിക്കൊണ്ട് ഫൈനൽ പ്രവേശനം അർജന്റീന സാധ്യമാക്കുകയായിരുന്നു.പിന്നീട് ഫ്രാൻസിനെയും പരാജയപ്പെടുത്തി കൊണ്ട് അർജന്റീന വേൾഡ് കപ്പ് കിരീടം സ്വന്തമാക്കി.