തകർപ്പൻ വിജയം, കിരീടത്തിലേക്ക് കുതിച്ച് മാഞ്ചസ്റ്റർ യുണൈറ്റഡ്!

ഇന്നലെ EFL കപ്പിൽ നടന്ന മത്സരത്തിൽ വമ്പൻമാരായ മാഞ്ചസ്റ്റർ യുണൈറ്റഡിന് തകർപ്പൻ വിജയം. ആദ്യപാദ സെമിഫൈനൽ പോരാട്ടത്തിൽ എതിരില്ലാത്ത മൂന്ന് ഗോളുകൾക്കാണ് മാഞ്ചസ്റ്റർ യുണൈറ്റഡ് നോട്ടിങ്‌ഹാം ഫോറസ്റ്റിനെ പരാജയപ്പെടുത്തിയത്.ഇതോടുകൂടി ഫൈനലിന്റെ തൊട്ടരികിൽ എത്താൻ യുണൈറ്റഡിന് കഴിഞ്ഞിട്ടുണ്ട്. ഇനി രണ്ടാം പാദ സെമിഫൈനൽ മത്സരം കൂടിയാണ് നടക്കാനുള്ളത്.

ആദ്യ പകുതിയിൽ തന്നെ രണ്ട് ഗോളുകൾ നേടാൻ യുണൈറ്റഡിന് കഴിഞ്ഞിരുന്നു. ഒരു സോളോ റണ്ണിലൂടെയാണ് സൂപ്പർ താരം റാഷ്ഫോർഡ് ആറാം മിനിട്ടിൽ യുണൈറ്റഡിന് ലീഡ് നേടിക്കൊടുത്തത്.45ആം മിനുട്ടിൽ വെഗോസ്റ്റ് ലീഡ് ഉയർത്തി.

89ആം മിനിറ്റിൽ ഗോൾ നേടിക്കൊണ്ട് ബ്രൂണോ ഫെർണാണ്ടസ് ആണ് യുണൈറ്റഡിന്റെ ഗോൾ പട്ടിക പൂർത്തിയാക്കിയത്.എലാങ്കയാണ് ഈ ഗോളിന് അസിസ്റ്റ് നൽകിയത്. ഏതായാലും ഈ തകർപ്പൻ വിജയത്തോടുകൂടി ആശങ്കകൾ ഒന്നുമില്ലാതെ രണ്ടാം പാദസെമി കളിക്കാൻ യുണൈറ്റഡിന് സാധിക്കും.

സതാപ്റ്റണും ന്യൂകാസിലും തമ്മിലാണ് മറ്റൊരു സെമിയിൽ ഏറ്റുമുട്ടുന്നത്. ആദ്യപാദ മത്സരത്തിൽ എതിരില്ലാത്ത ഒരു ഗോളിന് ന്യൂകാസിൽ വിജയിച്ചിരുന്നു. 2017 ന് ശേഷം ഇതുവരെ ഒരു കിരീടം പോലും നേടാൻ യുണൈറ്റഡിന് കഴിഞ്ഞിട്ടില്ല. അതിന് വിരാമം കുറിക്കാൻ ടെൻ ഹാഗിന് സാധിക്കുമോ എന്നുള്ളതാണ് ആരാധകർ ഉറ്റുനോക്കുന്നത്.