റോഡ്രിഗോയോട് ചൂടായത് എന്ത്കൊണ്ട്? കാരണം വ്യക്തമാക്കി ആഞ്ചലോട്ടി!

ഇന്നലെ കോപ്പ ഡെൽ റേയിൽ നടന്ന മത്സരത്തിൽ ഒരു അസാധാരണമായ തിരിച്ചു വരവായിരുന്നു സ്പാനിഷ് വമ്പൻമാരായ റയൽ മാഡ്രിഡ് നടത്തിയിരുന്നത്. ആദ്യ പകുതിയിൽ എതിരില്ലാത്ത രണ്ടു ഗോളുകൾക്കായിരുന്നു റയൽ മാഡ്രിഡ് വിയ്യാറയലിനോട് പിറകിൽ നിന്നിരുന്നത്.എന്നാൽ രണ്ടാം പകുതിയിൽ മൂന്ന് ഗോളുകൾ തിരിച്ചടിച്ചുകൊണ്ട് റയൽ മാഡ്രിഡ് വിജയം കരസ്ഥമാക്കുകയായിരുന്നു.ഡാനി സെബയ്യോസിന്റെ മികവിലാണ് റയൽ മാഡ്രിഡ് വിജയം കരസ്ഥമാക്കിയത്.

ബ്രസീലിയൻ സൂപ്പർതാരമായ റോഡ്രിഗോ മത്സരത്തിന്റെ ആദ്യ ഇലവനിൽ ഉണ്ടായിരുന്നു.എന്നാൽ താരത്തിന് വലിയ ഇമ്പാക്ട് ഉണ്ടാക്കാൻ സാധിക്കാതെ പോയതോടെ മത്സരത്തിന്റെ 56ആം മിനുട്ടിൽ അദ്ദേഹത്തെ പരിശീലകൻ പിൻവലിച്ചു.അസെൻസിയോയെയാണ് ആഞ്ചലോട്ടി പകരം ഇറക്കിയത്. എന്നാൽ സബ്സ്റ്റിറ്റ്യൂട്ട് ചെയ്യപ്പെട്ടത് റോഡ്രിഗോക്ക് ഇഷ്ടപ്പെട്ടിരുന്നില്ല. അതുകൊണ്ടുതന്നെ ആഞ്ചലോട്ടിയെ ഗൗനിക്കാതെയാണ് താരം ബെഞ്ചിലേക്ക് പോയത്.

അതിനുശേഷം റയൽ മാഡ്രിഡ് ബെഞ്ചിൽ ഇരിക്കുന്ന റോഡ്രിഗോയോട് ദേഷ്യപ്പെട്ടു കൊണ്ട് ആഞ്ചലോട്ടി സംസാരിക്കുന്നതിന്റെ ദൃശ്യങ്ങൾ പുറത്തുവന്നിരുന്നു.അതിന്റെ കാരണം മത്സരശേഷം മാധ്യമപ്രവർത്തകർ റയൽ പരിശീലകനോട് ചോദിക്കുകയും ചെയ്തു. എന്നാൽ പ്രശ്നങ്ങൾ ഒന്നും ഇല്ലെന്നും അദ്ദേഹം ഷേക്ക്ഹാൻഡ് നൽകാത്തത് ഒന്ന് ഓർമിപ്പിച്ചതാണ് എന്നുമാണ് ആഞ്ചലോട്ടി പറഞ്ഞിട്ടുള്ളത്.

” അദ്ദേഹം സബ്സ്റ്റിറ്റ്യൂട്ട് ചെയ്യപ്പെടുന്ന സമയത്ത് എനിക്ക് ഷേക്ക് ഹാൻഡ് നൽകാൻ മറന്നിരുന്നു.അത് ഞാൻ അദ്ദേഹത്തെ ഓർമ്മിപ്പിച്ചതാണ്.ഷേക്ക് ഹാന്റ് നൽകുന്ന കാര്യം മറക്കാൻ പാടില്ല എന്നാണ് ഞാൻ അദ്ദേഹത്തോട് ആവശ്യപ്പെട്ടത് ” ഇതാണ് ആഞ്ചലോട്ടി പറഞ്ഞിട്ടുള്ളത്.

ഇനി കോപ്പ ഡെൽ റേയിൽ ക്വാർട്ടർ ഫൈനൽ മത്സരങ്ങളാണ് നടക്കാനുള്ളത്. റയലും ബാഴ്സയും അത്ലറ്റിക്കോ മാഡ്രിഡുമൊക്കെ ക്വാർട്ടറിലേക്ക് യോഗ്യത കരസ്ഥമാക്കിയിട്ടുണ്ട്.