നൂറ്റാണ്ടിന്റെ ചിത്രമെന്ന് സോഷ്യൽ മീഡിയ,മെസ്സിയും ക്രിസ്റ്റ്യാനോയും ഒരുമിച്ചത് വൈറൽ.

ഖത്തർ വേൾഡ് കപ്പിന് ഇനി കേവലം മണിക്കൂറുകൾ മാത്രം ബാക്കിനിൽക്കെ ഫുട്ബോൾ ലോകത്തെ ഇളക്കിമറിച്ചുകൊണ്ട് ഒരു ചിത്രം ഇപ്പോൾ പുറത്തേക്ക് വന്നിട്ടുണ്ട്. സൂപ്പർ താരങ്ങളായ ലയണൽ മെസ്സിയും ക്രിസ്റ്റ്യാനോ റൊണാൾഡോയും ഒരുമിച്ച ഒരു ചിത്രമാണ് ഇപ്പോൾ ഫുട്ബോൾ ലോകത്ത് വലിയ സംസാര വിഷയമായിരിക്കുന്നത്. നൂറ്റാണ്ടിന്റെ ചിത്രമെന്നാണ് ഇപ്പോൾ സോഷ്യൽ മീഡിയയിൽ പലരും ഇതിനെ വിശേഷിപ്പിച്ചിട്ടുള്ളത്.

ഫ്രഞ്ച് ലക്ഷ്വറി ഹൗസ് ആയ ലൂയിസ് വൂട്ടണിന്റെ പരസ്യ ചിത്രത്തിലാണ് ഇരുവരും ഒരുമിച്ചിട്ടുള്ളത്. അമേരിക്കൻ ഫോട്ടോഗ്രാഫറായ അന്നീ ലെയ്ബോവിറ്റ്സാണ് ഈ വിഖ്യാതമായ ചിത്രം പകർത്തിയിട്ടുള്ളത്. അതായത് ലയണൽ മെസ്സിയും ക്രിസ്റ്റ്യാനോ റൊണാൾഡോയും ചെസ്സ് കളിക്കുന്ന ചിത്രമാണ് ഇപ്പോൾ ഫുട്ബോൾ ലോകത്ത് ചർച്ചയായിരിക്കുന്നത്.

ചിത്രത്തിന് വേണ്ടി രണ്ടുപേരും ഒരുമിക്കുകയായിരുന്നു. ഏതായാലും തങ്ങളുടെ കരിയറിലെ അവസാനത്തെ വേൾഡ് കപ്പിന് വേണ്ടിയുള്ള ഒരുക്കങ്ങളിലാണ് മെസ്സിയും ക്രിസ്റ്റ്യാനോ റൊണാൾഡോയും ഉള്ളത്. വേൾഡ് കപ്പിന് തൊട്ടു മുന്നേ ഈ ചിത്രം പുറത്തേക്ക് വന്നത് ആരാധകരെ സംബന്ധിച്ചിടത്തോളം തീർത്തും അപ്രതീക്ഷിതമായിരുന്നു.

മാത്രമല്ല സാമൂഹിക മാധ്യമങ്ങളിൽ ലയണൽ മെസ്സിയും ക്രിസ്റ്റ്യാനോ റൊണാൾഡോയും ഒരേ സമയമാണ് ഈ ചിത്രം പങ്കുവെച്ചിട്ടുള്ളത്.വലിയ രൂപത്തിലുള്ള ഒരു പ്രചാരമാണ് ഇപ്പോൾ ഈ ചിത്രത്തിന് ലഭിച്ചിരിക്കുന്നത്. ഏതായാലും ഇതിഹാസങ്ങൾ ഒരുമിച്ചത് ഇരു താരങ്ങളുടെയും ആരാധകർക്ക് വലിയ ആവേശം പകരുന്ന ഒരു കാര്യമാണ്.