ലയണൽ മെസ്സിയുടെ റെക്കോർഡ് തകർത്ത് കിലിയൻ എംബപ്പേ!

ഇന്നലെ യുവേഫ ചാമ്പ്യൻസ് ലീഗിൽ നടന്ന മത്സരത്തിൽ ഒന്നിനെതിരെ രണ്ടു ഗോളുകൾക്കായിരുന്നു പിഎസ്ജി യുവന്റസിനെ പരാജയപ്പെടുത്തിയത്.പിഎസ്ജിക്ക് വേണ്ടി സൂപ്പർ താരം കിലിയൻ എംബപ്പേ ഒരു ഗോളും ഒരു അസിസ്റ്റും കരസ്ഥമാക്കിയിരുന്നു.നുനോ മെന്റസാണ് പിഎസ്ജിയുടെ മറ്റൊരു ഗോൾ നേടിയത്. അതേസമയം ബൊനൂച്ചിയായിരുന്നു യുവന്റസിന്റെ ഏക ഗോൾ കരസ്ഥമാക്കിയത്.

പതിമൂന്നാം മിനിട്ടിലായിരുന്നു എംബപ്പേ പിഎസ്ജിക്ക് ലീഡ് നേടിക്കൊടുത്തത്. ലയണൽ മെസ്സിയുടെ പാസ് സ്വീകരിച്ച എംബപ്പേ ഒരു തകർപ്പൻ മുന്നേറ്റത്തിന് ഒടുവിലാണ് ഗോൾ നേടിയിട്ടുള്ളത്.ഈ ഗോളോട് കൂടി എംബപ്പേ ഒരു റെക്കോർഡ് ഇപ്പോൾ കരസ്ഥമാക്കിയിട്ടുണ്ട്. അതായത് യുവേഫ ചാമ്പ്യൻസ് ലീഗിൽ 40 ഗോളുകൾ പൂർത്തിയാക്കുന്ന ഏറ്റവും പ്രായം കുറഞ്ഞ താരമെന്ന റെക്കോർഡ് ആണ് എംബപ്പേ കരസ്ഥമാക്കിയിട്ടുള്ളത്.

സൂപ്പർ താരവും തന്റെ സഹതാരവുമായ ലയണൽ മെസ്സിയുടെ റെക്കോർഡാണ് ഇപ്പോൾ എംബപ്പേ തകർത്തിട്ടുള്ളത്.40 ഗോളുകൾ പൂർത്തിയാക്കുമ്പോൾ 23 വർഷവും 317 ദിവസവുമാണ് എംബപ്പേയുടെ പ്രായം. 24 വർഷവും 130 ദിവസവും പ്രായമുള്ള സമയത്താണ് ലയണൽ മെസ്സി ചാമ്പ്യൻസ് ലീഗിൽ 40 ഗോളുകൾ പൂർത്തിയാക്കിയിരുന്നത്.

മൂന്നാം സ്ഥാനത്ത് റയൽ മാഡ്രിഡ് ഇതിഹാസമായ റൗൾ ഗോൺസാലസാണ് ഉള്ളത്. 25 വർഷവും 258 ദിവസവും ആയിരുന്നു അദ്ദേഹത്തിന്റെ പ്രായം. നാലാം സ്ഥാനത്ത് കരിം ബെൻസിമയും അഞ്ചാം സ്ഥാനത്ത് ക്രിസ്ത്യാനോ റൊണാൾഡോയുമാണ് ഇടം നേടിയിട്ടുള്ളത്. അതേസമയം കിലിയൻ എംബപ്പേയുടെ ഈ റെക്കോർഡിന് വലിയ വെല്ലുവിളിയാണ് ഇപ്പോൾ സൂപ്പർതാരമായ എർലിംഗ് ഹാലന്റ് ഉയർത്തുന്നത്.