അത്ഭുത ഗോളുകളുമായി കലിയൂഷ്‌നി,ഉജ്ജ്വല ജയത്തോടെ ബ്ലാസ്റ്റേഴ്സ് തുടങ്ങി!

ഒരല്പം മുമ്പ് നടന്ന ഐഎസ്എല്ലിന്റെ ഉദ്ഘാടനം മത്സരത്തിൽ കേരള ബ്ലാസ്റ്റേഴ്സിന് തകർപ്പൻ വിജയം. ഒന്നിനെതിരെ 3 ഗോളുകൾക്കാണ് ബ്ലാസ്റ്റേഴ്സ് ഈസ്റ്റ് ബംഗാളിനെ പരാജയപ്പെടുത്തിയത്. പകരക്കാരനായി വന്നുകൊണ്ട് രണ്ട് അത്ഭുത ഗോളുകൾ നേടിയ ഇവാൻ കലിയൂഷ്‌നിയാണ് ബ്ലാസ്റ്റേഴ്സിന്റെ ഹീറോയായി മാറിയത്. ശേഷിച്ച ഗോൾ ലൂണ സ്വന്തമാക്കി.അലക്സാണ് ബംഗാളിന്റെ ഏക ഗോൾ നേടിയത്.

ലൂണ,സഹൽ,ജിയാനു,ദിമിത്രിയോസ് എന്നിവരെയൊക്കെ അണിനിരത്തി കൊണ്ടാണ് പരിശീലകൻ ആദ്യ ഇലവൻ പ്രഖ്യാപിച്ചത്. ആദ്യപകുതിയിൽ അവസരങ്ങൾ ലഭിച്ചുവെങ്കിലും മുതലെടുക്കാൻ ബ്ലാസ്റ്റേഴ്സിന് കഴിഞ്ഞില്ല.അതുകൊണ്ടുതന്നെ ഗോൾ രഹിത സമനിലയിലാണ് കലാശിച്ചത്.രണ്ടാം പകുതിയുടെ തുടക്കം തൊട്ടേ മിന്നുന്ന പ്രകടനമാണ് ബ്ലാസ്റ്റേഴ്സ് നടത്തിയത്. പലതവണയും ഈസ്റ്റ് ബംഗാൾ പരിശീലകനാണ് ബ്ലാസ്റ്റേഴ്സിനെ ഗോൾ നേടുന്നതിൽ നിന്നും തടഞ്ഞത്.

എന്നാൽ 72ആം മിനിറ്റിൽ ലൂണ ആദ്യ ഗോൾ നേടി. കബ്രയുടെ ഒരു നീളമേറിയ പാസിൽ ഒരു സുന്ദരമായ ഫിനിഷിംഗിലൂടെയാണ് ലൂണ ഗോൾ. പിന്നാലെ പകരക്കാരനായി വന്ന ഇവാൻ കലിയൂഷ്‌നിയുടെ അത്ഭുത ഗോൾ പിറന്നു.82ആം മിനുട്ടിൽ മൈതാന മധ്യത്തിൽ നിന്നും ആരംഭിച്ച സോളോ റൺ അവസാനിച്ചത് ഗോളിലാണ്.എന്നാൽ 87ആം മിനുട്ടിൽ അലക്സ് ഒരു ഗോൾ മടക്കിയതോടെ സ്കോർ 2-1 ആയി. എന്നാൽ തൊട്ടടുത്ത മിനിറ്റിൽ ഒരു ബുള്ളറ്റ് ഷോട്ടിലൂടെ ഇവാൻ കലിയൂഷ്‌നി വീണ്ടും ഗോൾ നേടിയതോടെ ബ്ലാസ്റ്റേഴ്സ് വിജയം ഉറപ്പിക്കുകയായിരുന്നു.

ഏതായാലും വിലപ്പെട്ട മൂന്ന് പോയിന്റുകൾ ബ്ലാസ്റ്റേഴ്സ് കരസ്ഥമാക്കി കഴിഞ്ഞു. സ്വന്തം ആരാധകർക്ക് മുന്നിൽ തകർപ്പൻ പ്രകടനമാണ് മത്സരത്തിൽ ബ്ലാസ്റ്റേഴ്സ് പുറത്തെടുത്തത്.