ലിവർപൂൾ താരങ്ങൾ കിട്ടാനാഗ്രഹിച്ചത് സിറ്റിയെയായിരുന്നില്ല,റയലിനെ തന്നെയായിരുന്നു : വെളിപ്പെടുത്തലുമായി സലാ!

യുവേഫ ചാമ്പ്യൻസ് ലീഗ് സെമി ഫൈനലിൽ രണ്ടിനെതിരെ അഞ്ച് ഗോളുകൾക്ക് വിയ്യാറയലിനെ തകർത്തു കൊണ്ടായിരുന്നു ലിവർപൂൾ ഫൈനലിൽ പ്രവേശിച്ചത്. അതേസമയം മാഞ്ചസ്റ്റർ സിറ്റിയെ അഞ്ചിനെതിരെ 6 ഗോളുകൾക്ക് പരാജയപ്പെടുത്തി കൊണ്ടാണ് റയൽ മാഡ്രിഡ് ഫൈനലിൽ എത്തിയത്.മെയ് ഇരുപത്തിയെട്ടാം തീയതിയാണ് കലാശപ്പോരാട്ടത്തിൽ റയലും ലിവർപൂളും തമ്മിൽ പോരടിക്കുക.

2018ലെ ചാമ്പ്യൻസ് ലീഗ് ഫൈനലിൽ ഇരുവരും ഏറ്റുമുട്ടിയിരുന്നു. അന്ന് ഒന്നിനെതിരെ മൂന്ന് ഗോളുകൾക്ക് ലിവർപൂളിനെ പരാജയപ്പെടുത്താൻ റയലിന് സാധിച്ചിരുന്നു. അതിനെ പ്രതികാരം തീർക്കാൻ ഇത്തവണ ലിവർപൂളിന് കഴിയുമോ എന്നുള്ളതാണ് ആരാധകർ ഉറ്റുനോക്കുന്നത്.

ഏതായാലും ഇതുമായി ബന്ധപ്പെട്ട ഒരു പ്രസ്താവന ലിവർപൂളിന്റെ സൂപ്പർതാരമായ മുഹമ്മദ് സലാ നടത്തിയിട്ടുണ്ട്. അതായത് ലിവർപൂളിലെ എല്ലാ താരങ്ങളും ഫൈനലിൽ എതിരാളികളായി കിട്ടാൻ ആഗ്രഹിച്ചത് റയലിനെ തന്നെയാണ് എന്നാണ് ഇദ്ദേഹം പറഞ്ഞിട്ടുള്ളത്. കഴിഞ്ഞ ദിവസം സ്കൈ സ്പോർട്സിനോട് സംസാരിക്കുകയായിരുന്നു സലാ. അദ്ദേഹത്തിന്റെ വാക്കുകൾ ഇങ്ങനെയാണ്.

” ലിവർപൂളിലെ എല്ലാവരും ആഗ്രഹിച്ചിരുന്നത് ഫൈനലിൽ റയലിനെ കിട്ടാൻ തന്നെയായിരുന്നു. അതിനെക്കുറിച്ച് എന്തുകൊണ്ടാണ് ഞങ്ങൾക്ക് കൂടുതൽ സംസാരിക്കാൻ അനുമതിയില്ലാത്തത് എന്നെനിക്കറിയില്ല.പക്ഷേ ഇതേ കുറിച്ച് സംസാരിക്കാൻ ഞാൻ ഓക്കെയാണ്. തീർച്ചയായും സിറ്റിയെ ലഭിക്കുന്നതിനേക്കാൾ ഞാൻ ഏറ്റവും കൂടുതൽ ആഗ്രഹിച്ച റയലിനെ ലഭിക്കാനാണ്. തീർച്ചയായും ഞാൻ അവർക്ക് കൂടുതൽ ക്രെഡിറ്റ് ഒന്നും നൽകില്ല. ഒരുപാട് മികച്ച താരങ്ങളും പരിശീലകനു ള്ള അവിശ്വസനീയമായ ഒരു ടീമാണ് അവർ. പക്ഷേ ആര് എന്നോട് ചോദിച്ചാലും ഞാൻ റയലിനെ കിട്ടാൻ ആഗ്രഹിച്ചിരുന്നു എന്ന് തന്നെയാണ് പറയുക. അത് എളുപ്പമുള്ള ഒരു ഉത്തരമാണ് ” ഇതാണ് സലാ പറഞ്ഞിട്ടുള്ളത്.

ഈ സീസണിൽ മിന്നും ഫോമിലാണ് സലാ ഇപ്പോൾ കളിച്ചു കൊണ്ടിരിക്കുന്നത്. 30 ഗോളുകളും 15 അസിസ്റ്റുകളുമാണ് ഈ സീസണിൽ താരത്തിന്റെ സമ്പാദ്യം.