ഫൈനലിൽ അർജന്റീനയെ കിട്ടണം : നെയ്മർ!

കോപ്പ അമേരിക്കയുടെ സെമി ഫൈനലിൽ പെറുവിനെ കീഴടക്കി കൊണ്ട് ഫൈനലിലേക്ക് പ്രവേശിക്കാൻ ബ്രസീലിന് സാധിച്ചിരുന്നു. ഏകപക്ഷീയമായ ഒരു ഗോളിനാണ് ബ്രസീൽ പെറുവിനെ കീഴടക്കിയത്. നെയ്മറുടെ അസിസ്റ്റിൽ നിന്ന് ലുകാസ് പക്വറ്റയാണ് വിജയഗോൾ നേടിയത്. ഇതോടെ തുടർച്ചയായ രണ്ടാം തവണയാണ് ബ്രസീൽ കോപ്പ അമേരിക്ക ഫൈനലിലേക്ക് യോഗ്യത നേടുന്നത്. അർജന്റീന-കൊളംബിയ മത്സരത്തിലെ വിജയികളായിരിക്കും ഫൈനലിൽ ബ്രസീലിന്റെ എതിരാളികൾ.എന്നാൽ ഫൈനലിൽ തങ്ങളുടെ എതിരാളികളായി അർജന്റീനയെ കിട്ടണമെന്ന് തുറന്ന് പറഞ്ഞിരിക്കുകയാണ് നെയ്മർ ജൂനിയർ. മാത്രമല്ല ഫൈനലിൽ ബ്രസീൽ വിജയിച്ചു കൊണ്ട് കിരീടം ചൂടുമെന്നും നെയ്മർ കൂട്ടിച്ചേർത്തിട്ടുണ്ട്. മത്സരശേഷം സംസാരിക്കുകയായിരുന്നു നെയ്മർ.

” ഫൈനലിൽ അർജന്റീനയെ കിട്ടാൻ വേണ്ടി ഞാൻ ആഗ്രഹിക്കുന്നു. അവർക്ക് വേണ്ടി കാത്തിരിക്കുകയാണ്. കാരണം എന്റെ ഒരുപാട് സുഹൃത്തുക്കൾ അവിടെയുണ്ട്. തുടർന്ന് ബ്രസീൽ ഫൈനലിൽ വിജയിക്കുകയും ചെയ്യും ” നെയ്മർ മത്സരശേഷം തമാശ രൂപേണ പറഞ്ഞു.അർജന്റീന-ബ്രസീൽ ഫൈനൽ സംഭവിക്കുകയാണെങ്കിൽ മെസ്സി-നെയ്മർ പോരാട്ടം കാണാൻ സാധിക്കും. കൂടാതെ നെയ്മറുടെ ഇപ്പോഴത്തെ സഹതാരങ്ങളായ ലിയാൻഡ്രോ പരേഡസും എയ്ഞ്ചൽ ഡി മരിയയും അർജന്റൈൻ നിരയിലുണ്ട്. അത്കൊണ്ട് തന്നെ തന്റെ സുഹൃത്തുക്കൾക്കെതിരെ കളിക്കാനുള്ള ആഗ്രഹമാണ് നെയ്മർ ഇതിലൂടെ പങ്കുവെച്ചത്.