കവാനി ഗോളടിച്ച മത്സരത്തിൽ ഉറുഗ്വക്ക് ജയം, ചിലിയെ അട്ടിമറിച്ച് പരാഗ്വ!

കോപ്പ അമേരിക്കയിൽ ഇന്ന് പുലർച്ചെ നടന്ന മത്സരത്തിൽ വമ്പൻമാരായ ഉറുഗ്വക്ക് വിജയം. എതിരില്ലാത്ത രണ്ട് ഗോളുകൾക്കാണവർ ബൊളീവിയയെ പരാജയപ്പെടുത്തിയത്.മത്സരത്തിന്റെ 40-ആം മിനുട്ടിൽ കാർലോസ് ലാമ്പേ വഴങ്ങിയ ഓൺ ഗോളാണ് ഉറുഗ്വക്ക് ലീഡ് നേടികൊടുത്തത്.79-ആം മിനിറ്റിലാണ് സൂപ്പർ സ്‌ട്രൈക്കർ എഡിൻസൺ കവാനിയുടെ ഗോൾ പിറക്കുന്നത്.ഫകുണ്ടോ ടോറസിന്റെ അസിസ്റ്റിൽ നിന്നാണ് കവാനി ഗോൾ നേടിയത്.ജയത്തോടെ ഗ്രൂപ്പിൽ നാലാം സ്ഥാനത്താണ് ഉറുഗ്വ.മൂന്ന് മത്സരങ്ങളിൽ നിന്ന് നാല് പോയിന്റാണ് ഉറുഗ്വയുടെ സമ്പാദ്യം.

അതേസമയം ഈ ഗ്രൂപ്പിൽ നടന്ന മറ്റൊരു മത്സരത്തിൽ കരുത്തരായ ചിലിയെ പരാഗ്വ അട്ടിമറിച്ചു. എതിരില്ലാത്ത രണ്ട് ഗോളുകൾക്കാണ് ചിലി പരാഗ്വയോട് പരാജയം ഏറ്റുവാങ്ങിയത്.മത്സരത്തിന്റെ 33-ആം മിനുട്ടിൽ സമുവാണ് പരാഗ്വക്ക് ലീഡ് നേടികൊടുത്തത്.58-ആം മിനിറ്റിൽ അൽമിറോൻ പെനാൽറ്റിയിലൂടെ ഗോൾ കണ്ടെത്തിയതോടെ പരാഗ്വ വിജയം ഉറപ്പാക്കുകയായിരുന്നു.ജയത്തോടെ ഗ്രൂപ്പിൽ രണ്ടാം സ്ഥാനത്തേക്ക് കയറാൻ പരാഗ്വക്ക് സാധിച്ചു. മൂന്ന് മത്സരങ്ങളിൽ നിന്ന് ആറ് പോയിന്റാണ് പരാഗ്വയുടെ സമ്പാദ്യം.4 മത്സരങ്ങളിൽ നിന്ന് 5 പോയിന്റുള്ള ചിലി മൂന്നാം സ്ഥാനത്താണ്.