മാഞ്ചസ്റ്റർ സിറ്റിയെ തടയാൻ കഴിയുക മാഞ്ചസ്റ്റർ സിറ്റിക്ക് മാത്രം: സ്റ്റെർലിംഗ്!

ഈ സീസണിൽ മിന്നും ഫോമിൽ കളിക്കുന്ന മാഞ്ചസ്റ്റർ സിറ്റി പ്രീമിയർ ലീഗ് കിരീടം ചൂടിയതിന് പിന്നാലെ മറ്റൊരു കിരീടം കൂടി കരസ്ഥമാക്കാനുള്ള ഒരുക്കത്തിലാണ്. ക്ലബ്ബിന്റെ ചരിത്രത്തിൽ ഇതുവരെ ലഭിക്കാത്ത ചാമ്പ്യൻസ് ലീഗ് തങ്ങളുടെ ഷെൽഫിൽ എത്തിക്കാനുള്ള ഒരുക്കത്തിലാണ് പെപും സംഘവും. തങ്ങളുടെ ആദ്യചാമ്പ്യൻസ് ലീഗ് ഫൈനലിൽ ചെൽസിയെയാണ് സിറ്റി നേരിടുന്നത്. ഈ മത്സരത്തിന് മുന്നേ ഏറെ ആത്മവിശ്വാസത്തോട് കൂടി സംസാരിച്ചിരിക്കുകയാണ് സിറ്റി താരം സ്റ്റെർലിംഗ്. ചെൽസിക്കെതിരെ വിജയിക്കാനാവുമെന്ന് തന്നെയാണ് അദ്ദേഹം വിശ്വസിക്കുന്നത്. മാഞ്ചസ്റ്റർ സിറ്റിയുടെ കുതിപ്പിന് തടയിടാൻ കഴിയുന്ന ഒരേയൊരു ടീം അത്‌ മാഞ്ചസ്റ്റർ സിറ്റി തന്നെയാണ് എന്നാണ് സ്റ്റെർലിംഗ് പറഞ്ഞിട്ടുള്ളത്. ശനിയാഴ്ച്ച രാത്രിയാണ് സിറ്റി ചെൽസിയെ നേരിടുന്നത്. അവസാന നാല് മത്സരങ്ങളിൽ മൂന്നിലും ചെൽസി പരാജയപ്പെട്ടു എന്നുള്ളത് സിറ്റിയുടെ ആത്മവിശ്വാസം വർധിപ്പിക്കുന്നുണ്ട്.

“ഞാൻ സത്യസന്ധമായി പറയുകയാണെങ്കിൽ ഞങ്ങളെ തടയിടാൻ സാധിക്കുക ഞങ്ങൾക്ക് മാത്രമാണ്. അതൊരു കടുത്ത മത്സരമാവുമെന്ന് ഞാൻ പ്രതീക്ഷിക്കുന്നുണ്ട്.പക്ഷെ അതിനെ ഞങ്ങൾക്ക് മറികടക്കാനാവും.ഞങ്ങളുടെ ക്യാമ്പ് വളരെയധികം റിലാക്സ്ഡാണ്.ഒരു ഫൈനൽ കളിക്കുന്നതിന്റെ എക്സ്പീരിയൻസിനുള്ള ഒരുക്കങ്ങളിലാണ് എല്ലാവരും.കഴിഞ്ഞ സീസണുകളിൽ പലപ്പോഴും ഞങ്ങളെ ഭാഗ്യം തുണച്ചിരുന്നില്ല.ഞങ്ങൾക്ക് അനായാസം വിജയിക്കാൻ സാധിക്കുമായിരുന്ന പല മത്സരങ്ങളും പല വിധ കാരണങ്ങളാൽ അതിന് സാധിക്കാതെ പോയിട്ടുണ്ട്.ചില സമയങ്ങളിൽ ഫുട്ബോൾ അങ്ങനെയാണ്. എന്നാൽ ഈ സീസണിൽ ഞങ്ങൾ മികച്ച രൂപത്തിൽ കളിക്കുന്നുണ്ട്, കൂടാതെ ഭാഗ്യവും ഞങ്ങളെ തുണക്കുന്നുണ്ട് ” സ്റ്റെർലിംഗ് പറഞ്ഞു.