ലോകത്തിലെ ഏറ്റവും മികച്ച താരത്തിൽ നിന്നാണ് ഞാൻ പഠിക്കുന്നത്, മെസ്സിയെ കുറിച്ച് കൊൺറാഡ്!

ഈ സീസണിൽ പലപ്പോഴും എഫ്സി ബാഴ്സലോണയുടെ സീനിയർ സ്‌ക്വാഡിൽ ഇടം പിടിക്കാൻ കഴിഞ്ഞിട്ടുള്ള താരമാണ് കൊൺറാഡ്. എന്നാൽ താരത്തിന് കളിക്കാൻ അവസരം ലഭിക്കാറില്ല. ബാഴ്സ ബി താരമായ കൊൺറാഡ് ടീമിനൊപ്പം സഞ്ചരിക്കുന്ന കാരണത്താൽ ബി ടീമിന് വേണ്ടിയും അധികം കളിക്കാറില്ല. പക്ഷേ ലയണൽ മെസ്സിയുൾപ്പെടുന്ന സൂപ്പർ താരങ്ങൾക്കൊപ്പം സമയം ചിലവഴിക്കാൻ കഴിയുന്നതിൽ സന്തോഷം പ്രകടിപ്പിച്ചിരിക്കുകയാണ് താരം. ലോകത്തിലെ ഏറ്റവും മികച്ച താരമായ മെസ്സിയിൽ നിന്നാണ് താൻ പഠിക്കുന്നത് എന്നാണ് കൊൺറാഡ് ഇതേ കുറിച്ച് പ്രതികരിച്ചത്.

” യഥാർത്ഥത്തിൽ ഈയൊരു പൊസിഷനിൽ തുടരുന്നത് എളുപ്പമല്ല. ഒരു ഫുട്ബോളർ എന്ന നിലയിൽ ഞാൻ എപ്പോഴും കളിക്കാൻ ആഗ്രഹിക്കുന്നുണ്ട്.സീസണിന്റെ തുടക്കത്തിൽ എനിക്ക് ബി ടീമിനൊപ്പം കളിക്കാൻ അവസരം ലഭിച്ചിരുന്നില്ല.എന്തെന്നാൽ എനിക്ക് സീനിയർ ടീമിനൊപ്പം സഞ്ചരിക്കേണ്ടതുണ്ടായിരുന്നു.പിന്നീട് ഇപ്പോൾ ബി ടീമിനൊപ്പം കളിക്കുന്നു. പക്ഷേ കുറേ കാലം കളിക്കാത്തതിനാൽ ആ താളം കണ്ടെത്താൻ ബുദ്ധിമുട്ടുന്നുണ്ട് ” കൊൺറാഡ് തുടർന്നു.

” ഫസ്റ്റ് ടീമിനൊപ്പം തുടരുക എന്നുള്ളത് നല്ല അനുഭവമാണ്. അവരോടൊപ്പം പരിശീലിക്കുന്നത് ഒരുപാട് ഗുണം ചെയ്യും. ലോകത്തിലെ ഏറ്റവും മികച്ച താരമായ ലയണൽ മെസ്സിയിൽ നിന്ന് പഠിക്കാൻ സാധിക്കുന്നുണ്ട്. എന്റെ ആരാധനാപാത്രങ്ങളിൽ ഒരാളാണ് മെസ്സി.അദ്ദേഹത്തിൽ നിന്നും മറ്റുള്ള താരങ്ങളിൽ നിന്നും പഠിക്കാൻ അവസരം ലഭിക്കുന്നത് തന്നെ ഭാഗ്യമാണ്. പലപ്പോഴും അദ്ദേഹം എന്നെ സഹായിക്കാറുമുണ്ട് ” കൊൺറാഡ് പറഞ്ഞു.