ഇരട്ടഗോളുകളടിച്ച് ലൗറ്ററോയും ലുക്കാക്കുവും, കൂറ്റൻ ജയത്തോടെ ഇന്റർ ഫൈനലിൽ !

യൂറോപ്പ ലീഗിൽ ഇന്നലെ നടന്ന രണ്ടാം സെമി ഫൈനലിൽ ഇറ്റാലിയൻ കരുത്തരായ ഇന്റർമിലാന് കൂറ്റൻ ജയം. എതിരില്ലാത്ത അഞ്ച് ഗോളുകൾക്കാണവർ ഷക്തർ ഡോണെസ്‌ക്കിനെ തകർത്തു വിട്ടത്. ഇരട്ടഗോളുകളുമായി തിളങ്ങിയ റൊമേലു ലുക്കാക്കു-ലൗറ്ററോ മാർട്ടിനെസ് സഖ്യമാണ് ഇന്ററിന് മിന്നും ജയം നേടികൊടുത്തത്. ജയത്തോടെ യൂറോപ്പ ലീഗിന്റെ ഫൈനലിൽ പ്രവേശിക്കാൻ ഇന്ററിന് കഴിഞ്ഞു. മാഞ്ചസ്റ്റർ യുണൈറ്റഡിനെ 2-1 ന് തകർത്തു കൊണ്ട് വരുന്ന സ്പാനിഷ് ശക്തികളായ സെവിയ്യയാണ് ഫൈനലിൽ ഇന്ററിന്റെ എതിരാളികൾ.

ആദ്യപകുതിയിൽ ഒരു ഗോൾ മാത്രം നേടിയ ഇന്റർ രണ്ടാം പകുതിയിലാണ് നാലെണ്ണം അടിച്ചു കൊണ്ട് കരുത്ത് കാട്ടിയത്. പത്തൊൻപതാം മിനുട്ടിൽ ബറെല്ലയുടെ ക്രോസിൽ നിന്ന് ഒരു ഹെഡറിലൂടെയാണ് ലൗറ്ററോ വലകുലുക്കിയത്. എന്നാൽ രണ്ടാം ഗോളിന് വേണ്ടി 64-ആം മിനുട്ട് വരെ കാത്തിരിക്കേണ്ടി വന്ന്. ബ്രോസോവിച്ചിന്റെ അസിസ്റ്റിൽ നിന്ന് ഡിആംബ്രോസിയോ ആണ് ഗോൾ നേടിയത്. എഴുപത്തിനാലാം മിനുട്ടിൽ ലൗറ്ററോ ലുക്കാക്കുവിന്റെ അസിസ്റ്റിൽ നിന്ന് ലൗറ്ററോ ഇരട്ടഗോളുകൾ തികച്ചു.പിന്നീട് ലുക്കാക്കുവിന്റെ ഊഴമായിരുന്നു. 78-ആം മിനുട്ടിൽ ലൗറ്ററോയുടെ പാസിൽ നിന്ന് ലുക്കാക്കു ഗോൾ നേടി. 84-ആം മിനുട്ടിലാണ് ലുകാകുവിന്റെ മറ്റൊരു മികച്ച ഗോൾപിറന്നത്. എതിരാളിയേ വേഗത കൊണ്ട് തോല്പിച്ച് ലുക്കാക്കു ഗോൾ നേടുകയായിരുന്നു.