സുപ്രധാന താരങ്ങളെ നഷ്ടമാവും, യുണൈറ്റഡിനെ നേരിടാനൊരുങ്ങുന്ന വിയ്യാറയലിന് തിരിച്ചടി!

ചാമ്പ്യൻസ് ലീഗിലെ രണ്ടാം റൗണ്ട് പോരാട്ടത്തിൽ സ്പാനിഷ് വമ്പൻമാരായ വിയ്യാറയലിന്റെ എതിരാളികൾ കരുത്തരായ മാഞ്ചസ്റ്റർ യുണൈറ്റഡാണ്.വരുന്ന ബുധനാഴ്ച്ച രാത്രി ഇന്ത്യൻ സമയം 12:30-നാണ് മത്സരം അരങ്ങേറുക. യുണൈറ്റഡിന്റെ മൈതാനമായ ഓൾഡ് ട്രാഫോഡിൽ വെച്ചാണ് മത്സരം അരങ്ങേറുക.

എന്നാൽ വിയ്യാറയലിനെ സംബന്ധിച്ചിടത്തോളം കാര്യങ്ങൾ അത്ര ശുഭകരമല്ല. എന്തെന്നാൽ അവരുടെ രണ്ട് സുപ്രധാന താരങ്ങൾക്ക്‌ ഈ മത്സരം നഷ്ടമാവാൻ സാധ്യതയുണ്ട്.ജെറാർഡ് മൊറീനോ, യുവാൻ ഫോയ്ത്ത് എന്നിവർക്കാണ് പരിക്കുള്ളത്. ഈ രണ്ട് താരങ്ങളും യുണൈറ്റഡിനെതിരെ കളിക്കാൻ സാധ്യത കുറവാണ് എന്നാണ് ഫുട്ബോൾ എസ്പാന കണ്ടെത്തിയിരിക്കുന്നത്. കഴിഞ്ഞ റയലിനെതിരെയുള്ള മത്സരത്തിലാണ് ഡിഫൻഡറായ ഫോയ്ത്തിന് പരിക്കേറ്റത്. അതേസമയം മൊറീനോയാവട്ടെ മുമ്പേ പരിക്കിന്റെ പിടിയിലാണ്.

കഴിഞ്ഞ ലീഗ് മത്സരത്തിൽ റയലിനെ സമനിലയിൽ തളക്കാൻ വിയ്യാറയലിന് സാധിച്ചിരുന്നു. അതിന് ശേഷം പരിശീലകൻ എമറി ടീമിനെ പ്രശംസിക്കുകയും ചെയ്തിരുന്നു. ” മികച്ച പ്രകടനമാണ് റയലിനെതിരെ ഞങ്ങൾ കാഴ്ച്ചവെച്ചത്.മത്സരം വിജയിക്കാനായില്ല എന്നത് തിരിച്ചടി തന്നെയാണ്.പക്ഷേ ഞങ്ങൾ ശരിയായി വഴിയിലാണ്.ടീമിന്റെ കാര്യത്തിൽ നല്ല രീതിയിൽ ഉള്ള പുരോഗതിയുണ്ട് ” എമറി പറഞ്ഞു.

ചാമ്പ്യൻസ് ലീഗിലെ ആദ്യമത്സരത്തിൽ വിയ്യാറയൽ അറ്റലാന്റയോട് സമനില വഴങ്ങിയിരുന്നു. അത്കൊണ്ട് തന്നെ യുണൈറ്റഡിനെതിരെ വിയ്യാറയലിന് ജയം ആവിശ്യമാണ്.